Júkti áielderde koronavirýs jáne basqa respiratorlyq aýrýlar anaǵurlym aýyr ótedi jáne asqynýy múmkin. Bul týraly Almaty qalasy Perinataldyq ortalyǵynyń akýsher-ginekolog dárigeri Ásel Omarqulova málim etti, dep habarlaidy QazAqparat.
Onyń aitýynsha, júkti áielderdi emdeý tásili ártúrli. Sonymen qatar, olardyń aǵzasy sýyq tiiýge, juqpaly aýrýlarǵa, onyń ishinde koronavirýske asa sezimtal bolady.
«Júkti áielder arasynda koronaviýrstyń taralýyna kelsem, ol aǵzaǵa aýa arqyly jáne turmystyq jaǵdaida aýyrǵan adamnan juǵady. Virýs aǵzaǵa túsken soń kóptegen ózgerister shaqyrady, iaǵni jergilikti jáne immýndyq. Jergilikti bul qan quramyndaǵy gemostazdyń qalypty jaǵdaiyn buzady. Qan tamyrlary qabyrǵasynyń ótkizgishtigin joǵarylatady. Aǵzaǵa otteginiń tolyqqandy jetpeýine bailanysty kóptegen qan tamyrlarynda makro jáne mikro tromptar túziledi, onyń arty asqynýǵa ákeledi»,-deidi dáriger.
Júkti áielde inkýbatsiialyq merzim 2-14 kún aralyǵynda damýy múmkin. Virýs juqqanda keide belgisi bilinbeidi, ol tek test alǵanda ǵana anyqtalady. Al, siptomdy kezde joǵary tynys alý joldaryn zaqymdap farangit, renit belgilerimen kórinedi. Al, tómengi tynys alý joldarymen ókpe qabynsa ol pnevmoniia belgisimen basqa da múshelerdi zaqymdaidy. Asqazan joldaryn zaqymdasa, onda gastrit, júike júiede nevrit, midy zaqymdasa – meningit belgilerimen kórinýi múmkin.
Sonymen qatar ol Almatynyń perinataldyq ortalyǵynda biyl KVI juqtyrǵan 279 júkti áiel dárigerlerdiń baqylaýynda bolǵanyn jetkizdi.
«Ortalyqtyń infektsiialyq bóliminde 279 júkti áiel men 8 jańa týǵan náreste emdeldi, 191 áiel bosandy. Dárigerler júktiligi 22-den 33-shi aptaǵa deiingi bosaný qaýpi joǵary áielderdi baqylaýda ustap, emdedi»,- deidi Ásel Omarqulova.
Spiker sondai-aq júkti jáne bala emizetin analardy koronavirýstan emdeý erekshelikteri týraly aitty.
«Júktilik kezinde ósip kele jatqan náreste áieldiń ókpesi men júregine qysym jasai bastaidy, bul qan ainalymyn qiyndatady. Eger bolashaq ana COVID-19-ben qatty aýyrsa, bul onyń jaǵdaiyn nasharlatyp, tynys alýyn qiyndatady. Mundai jaǵdailarda dárigerler áieldi aýrýhanada óte muqiiat baqylaidy. Ádette, mundai naýqastarda tynys jetispeýshiliginiń tez damýy, merziminen buryn bosaný qaýpiniń joǵarylaýy baiqalady. Perinataldy asqynýlardyń órshý qaýpi óte joǵary», - dedi ginekolog.
Onyń aitýynsha, jedel túrde aýrýhanaǵa jatqyzýdyń negizgi kórsetkishi – dene qyzýy men 5 kún boiy 38 S jáne odan joǵary temperatýra, qyzý túsiretin preparattarǵa tózimdi, qalypty turmystyq júkteme kezinde entigip sóileý, aýrý sipaty údeýi, satýratsiianyń tómendeýi.
«COVID-19-ben aýyr jáne óte aýyr jaǵdaidaǵy júkti áielderdi, bosanǵan jáne jańa bosanǵan áielderdi Almaty qalasynyń perinataldyq ortalyǵynyń akýsher-ginekology, perinataldy, neonataldy jáne reanimatsiialyq terapiia mamandarynan turatyn kópsalaly top baqylap, olardyń tez saýyǵýy úshin qoldan kelgenniń bárin jasaidy», - deidi ol.
