Biyl «Joshy han» tarihi-mádeni ortalyǵynyń qurylysy aiaqtalady. Bul týraly QR Mádeniet jáne sport ministrligi Týrizm indýstriiasy komitetiniń tóraǵasy Dastan Rysbekov aitty, dep habarlaidy QazAqparat.
«Biyl ol ortalyqta qarqyndy jumys júrgiziledi. Atap aitqanda, Joshy han men Alasha han mavzoleilerin ǵylymi-restavratsiialaý jumystary, Ulytaý mýzeii ulttyq qoryǵyndaǵy sapar ortalyǵynyń qurylysy, tarihi-aimaqtyq mýzei qurylysy jáne aýdany 800 sharshy metr bolatyn «Joshy han» tarihi-mádeni ortalyǵynyń qurylysy aiaqtalady», - dedi Dastan Rysbekov Ortalyq kommýnikatsiialar alańynda ótken brifing barysynda.
Buǵan deiin komitet tóraǵasy biyl elimizde ishki týrizmge qyzyǵýshylyq artatynyn aitqan edi.
«Biyl ishki týrizm salasynda úlken suranys bar ekendigin baiqap otyrmyz. Jalpy baǵyttar ózgere qoimaidy. Olar: Alakól, Býrabai, Kaspii, Qapshaǵai, Almatynyń taýly klasteri. Buǵan qosa Baianaýyl men Shalqar, Imantaý kýrorttyq aimaqtaryna qyzyǵýshylyq artyp keledi. Túrkistan, Taraz baǵytynda tarihi-mádeni týrizmge de airyqsha qyzyǵýshylyq baiqalady. Ulytaýdyń da áleýeti artyp keledi», - degen edi ol.
