Keshe Memleket basshysy Qasym-Jomart Toqaev Qazaqstan halqyna kezekti Joldaýyn usyndy. Joldaýdan soń túrli sala sarapshylary men mamandary pikirlerin ortaǵa salyp jatyr. Osy oraida Qazaq ulttyq horeografiia akademiiasynyń birinshi prorektory Bibigúl Núsipjanova Joldaýǵa bailanysty pikirimen bólisti, dep habarlaidy QazAqparat.
«Pandemiia halyqtyń ómir súrý salty men deńgeiine qatty áser etti. Saldarynan halyq memlekettiń qoldaýy men qorǵaýyna muqtaj boldy. Osy sátte Prezident Qasym-Jomart Toqaev búgingi Joldaýynda halyq óz problemasymen jalǵyz qalmaitynyn aiqyn kórsetti. Elimizdiń ekonomikalyq jáne áleýmettik ahýalyn jaqsartý jolynda tyń sharalar qolǵa alynbaq.
El Táýelsizdiginiń 30 jyldyǵyna sáikes kelip otyrǵan Joldaýda qozǵalǵan negizgi taqyryptardyń biri bilim berý. Memleket basshysy jańa mektepter salý, pedagogtardy materialdyq kótermeleý, olardyń biliktiligin arttyrý, oqý baǵdarlamalaryn jetildirý, tegin tehnikalyq jáne kásiptik bilim berýmen tolyq qamtý sekildi jaittarǵa jeke toqtalyp ótti», - dedi Bibigúl Núsipjanova.
Sondai-aq, spiker Memleket basshysy alǵa naqty mindet pen qatar jaýapkershilik júktegenin jetkizdi.
«Óz kezegimizde Qazaq ulttyq horeografiia akademiiasy sapaly bilim berýge erekshe kóńil bóledi. Ortalyq Aziiadaǵy kóp deńgeili kásibi horeografiialyq bilim beretin birden-bir oqý orny bola otyryp, biz Prezident júktegen jaýapkershilikti sezinemiz. Bizdiń tárbielenýshilerimiz qazaqstandyq ónerdi búkil álemge tanytyp, pedagogtardyń qulshynysy men kásipqoilyǵynyń arqasynda joǵary kórsetkishterge qol jetkizýde. Osy tusta, Joldaýda aitylǵan jas talanttardy qoldaý kerektigi erekshe qýantady. Olarǵa joǵary oqý oryndaryna túsý úshin konkýrstan tys negizde granttar berilip, birjolǵy aqshalai syilyqaqylar tólenetini de aityldy», - deidi ol.
