91 jas dáriger joldamamen jumysqa barmaǵany úshin grant shyǵynyn ótedi. Bul týraly Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabyna aitylǵan, dep habarlaidy QazAqparat.
«Meditsinalyq kadrlardy aýyldyq eldi mekenderge tartý jumystary úsh baǵytta júrgiziledi: óńir qajettiligine sáikes túlekterdi jumysqa ornalastyrý, áleýmettik paket usyný, memlekettik bilim berý tapsyrysyn bólý. 2019 jyldan bastap túlekterdi óńirlik qajettilikterge sáikes joldaýdy Densaýlyq saqtaý ministrliginiń túlekterdi/jas mamandardy bólý jónindegi komissiiasy júrgizedi»,- dep atap ótedi vitse-premer jaýabynda.
Onyń atap ótýinshe, sońǵy 3 jylda Komissiia jumysqa jibergen túlekterdiń arasynda dálelsiz sebeptermen joldama berilgen eldi mekenge jumysqa barmaý faktileri orta eseppen shamamen 8 paiyzdy quraidy. Naqtyraq aitqanda, 2019 jyly – 2561 mamannyń 228-i, 2020 jyly – 2326 mamannyń 155-i, biyl 3160 mamannyń 255-i joldamamen jumys ornyna barmaǵan.
«Mundai túlekterge qatysty oqytý shyǵyndaryn qaitarý is-sharalary qoldanylady. Qarjy ortalyǵynyń aqparaty boiynsha, bilim berý granty boiynsha meditsinalyq mamandyqtarda oqýdy bitirgen jáne jumys oryndaryna shyqpaǵan 91 jas maman oqytý shyǵyndaryn (respýblikalyq biýdjetke 200 mln teńge) ótegen. Mindettemeni oryndamaǵan basqa túlekterge qatysty jumystar jalǵasýda. Biyldan bastap bilim berý granty boiynsha oqýǵa túsken túlekterdi jumysqa ornalastyrý sharttary jeńildetildi. Endi túlekter memlekettik mekemelerde ǵana emes, jeke uiymdarda da jumys istei alady», - dedi Eraly Toǵjanov.
