Nur-Sultanda alǵash ret jol belgisi retinde sary syzyq qoldanyldy – Máńgilik el dańǵylyndaǵy bólý jolaǵy saryǵa boialdy, dep habarlaidy "Ult aqparat".
Elorda politsiia departamentiniń málimetinshe, eksperiment jol apatyn azaitýǵa baǵyttalǵan.
"Elorda aýmaǵynda pilottyq joba aiasynda Máńgilik el dańǵylynyń boiynda Uly Dala kóshesinen Qabanbai batyr dańǵylyna deiin jol belgisi retinde sary tústi tutas qos syzyqty qoldaný boiynsha jumystar eksperimenttik tártipte uiymdastyryldy. Sondai-aq, bul belgini Jeńis jáne Saryarqa dańǵyldarynda qoldaný josparlanyp otyr", - dep túsindirdi politsiia.
Mundai belgi álemniń kóptegen elinde qoldanylady.
"Bul belgi júrgizýshilerdiń jolǵa nazar salýyna múmkindik beredi, sonymen qatar qysta aýa raiy nasharlap, jaýyn-shashyn túsken kezde jol qaýipsizdigi deńgeiin arttyrady", - dep túsindirdi ákimshilik politsiia basqarmasynyń bastyǵy Eljan Chýpekov.
Osy belgini qoldanýǵa bailanysty zańnamalyq aktilerge, sonyń ishinde Jol qozǵalysy erejesine tiisti ózgerister engiziledi.
