Foto: videodan skrinshot
Almatyda áleýmettik jelide keńinen talqylanyp jatqan oqiǵa qoǵam nazaryn aýdartty. Qalalyq telekommýnikatsiia jáne mashina jasaý kolledjiniń qyzmetkeri basshylyqpen bolǵan janjaldan keiin aýrýhanaǵa túsken, dep habarlaidy Ult.kz.
Bes ailyq júkti áieldiń sózinshe, ujym jinalysy kezinde kolledj direktory Ardaq Qojahmetova áriptesteriniń kózinshe oǵan daýys kóterip, aýyr sózder aitqan. Qyzmetker muny ar-namysyna tietin áreket ári psihologiialyq qysym dep baǵalaidy.
Oqiǵadan soń áieldiń qan qysymy 150/100-ge deiin kóterilip, jedel járdem shaqyrylǵan. Dárigerler ony baqylaýǵa alyp, júktilikti saqtaý maqsatynda statsionarǵa jatqyzǵan. Aldyn ala málimet boiynsha, kúizelis saldarynan merziminen buryn bosaný qaýpi týyndaǵan.
Jelide taraǵan beinejazbada direktordyń qatqyl únmen sóilegeni estiledi. Keiin ol qyzmetkerdiń júkti ekenin «umytyp ketkenin» aitqan. Bul jaǵdai áleýmettik jeli qoldanýshylary arasynda túrli pikir týdyrdy.
Qyzmetkerdiń aitýynsha, sol kúni ujym direktor kabinetine áriptesin quttyqtaý úshin jinalǵan. Alaida basshy qyzmetkerlerge daýys kóterip, negizsiz aiyptaýlar aitqan.
«Eshbir zańdy negizsiz kópshilik aldynda kemsitip, ar-namysyma tietin sózder aitty. Beinejazbada aitylǵan aiyptaýlar shyndyqqa janaspaidy. Meniń bes ailyq júkti ekenimdi direktor jaqsy biledi. Soǵan qaramastan psihologiialyq qysym kórsetip, qorlady. Bul meniń eńbek etý quqyǵymdy buzý ári júkti áielderdi qorǵaýǵa baǵyttalǵan zań normalaryna qaishy», – deidi ol.
Sondai-aq ol mundai jaǵdaidyń buǵan deiin de qaitalanǵanyn jetkizdi.
Qazirgi tańda aýrýhanaǵa túsken qyzmetker memlekettik organdarǵa resmi shaǵym túsirgen. Ótinish e-Otinish platformasy arqyly joldanǵan. Ol Qazaqstan Respýblikasynyń Eńbek kodeksi men qyzmettik ádep talaptary buzyldy dep esepteidi.
