Foto: ashyq derekkóz
Jetisý oblysynda qutqarý jumystary kezinde TJD qyzmetkeri qaza tapty, dep habarlaidy oblystyq tótenshe jaǵdailar departamentiniń baspasóz qyzmeti.
Qaiǵyly oqiǵa 7 naýryzda bolǵan. Jetisý oblysy Panfilov aýdany Atameken aýyldyq okrýgindegi Altynkól kólinde er adam sýǵa aǵyp ketken.
"Balyq aýlap júrgende muz jarylyp, saldarynan bir adam muz kesegimen birge kóldiń ortasyna qarai aǵyp ketkeni týraly habarlama tústi", - deidi departament qyzmetkerleri.
Oqiǵa ornyna Jetisý oblysynyń TJD kúshteri men quraldary, Jarkent qalasyndaǵy №11 órt sóndirý bóliminiń qyzmetkerleri, Taldyqorǵan qalasynyń jedel-qutqarý jasaǵy, sondai-aq QR TJM "Barys" respýblikalyq qutqarý qyzmetiniń jáne Almaty oblysy TJD qutqarýshylary jiberilgen.
"Qutqarý jumystaryn júrgizý barysynda muz qaitadan jarylyp, sonyń saldarynan Panfilov aýdany tótenshe jaǵdailar bóliminiń №11 órt sóndirý bóliminiń qaraýyl bastyǵy, azamattyq qorǵaý maiory Taranov Damir Taiyrjanuly kóz jumdy", - deidi tótenshe jaǵdailar qyzmeti.
Damir Taranov azamattyq qorǵaý júiesindegi eńbek jolyn 2016 jyldan bastaǵan. Marqumnyń artynda jubaiy men eki balasy qaldy.
