Túrkistan oblysy politseileri qujattaryn joǵaltyp alǵan qart turǵynnyń qujatyn qaita jasap berdi, dep habarlaidy "Ult aqparat" oblystyq politsiia departamentine silteme jasap.
Aita keteiik, biylǵy aqpan aiynda Jetisai aýdany Kúrishti aýylynyń turǵyny 99 jasqa kelgen Kúlai Súgirbaevanyń osy kúnge deiin jeke kýálik almaǵany anyqtalǵan edi. Kúlai áje óziniń barlyq qujattaryn joǵaltyp alǵan, sonyń saldarynan ul-qyzdary da qujatsyz júrgen.
Politseiler atalǵan qart turǵynnyń Jetisai aýdany politsiia bólimine ótinish bildirmegenin jáne kóshi-qon qyzmetine júginbegenin aitqan bolatyn.
Osyǵan bailanysty qujatsyz qart turǵynǵa tártip saqshylary Qazaqstan Respýblikasy IIM buiryǵyna sáikes QR azamattyǵyna qujattandyrý úshin birinshi kezekte politsiia bólimine baryp ótinish jazýy tiis ekendigin túsindirgen. Oǵan qosa QR azamaty ekenin anyqtaý úshin ótinishhatpen birge týý týraly kýálik, eńbek kitapshasy, bilimi týraly attestat, diplom nemese sharýashylyq boiynsha kitaptan úzindi kóshirmelerin tapsyrýy qajet.
Alaida, tekserý barysynda ájeide joǵaryda kórsetilgen qujattardyń eshqaisysy joq ekeni belgili boldy.
Osyǵan qaramastan Jetisai APB kóshi-qon qyzmetkerleri QR IIM talaptaryn egjei-tegjeili túsindire otyryp, turǵynǵa qujattaryn jinaqtaýǵa kómektesti. 2-3 ai aralyǵynda sot sheshimimen týý týraly kýáligi qalpyna keltirilip, daiyn boldy. Odan keiin jedel áreket etken politseiler K.Súgirbaevanyń QR azamattyǵyn rastaý týraly ótinishhatyn qabyldady. 20 kúnnen keiin turǵynnyń jeke kýáligi daiar boldy.
Osylaisha bir ǵasyr jasaǵan ájeige jeke kýáligin áperý úshin tártip saqshylary barlyq qajetti sharalardy júrgizip, kómek qolyn sozdy. Daiyn qujatty aqjaýlyqty ananyń shańyraǵyna baryp, arnaiy tabystady.
Óz kezeginde jetisailyq 100 jastaǵy ana qujattaryn jasap bergen politseilerge alǵysyn aityp, batasyn berdi.
