Foto: Azattyq
Qandy qańtar oqiǵasy kezinde ákesinen aiyrylǵan tórt bala, endi anasyz qaldy. Marqum Saia Esengeldi jol apatynan qaza tapty. Tul jetim qalǵan balalardyń taǵdyry ne bolmaq, qandai kómek kórsetilip jatyr? Tolyǵyraq Ult.kz habarlaidy.Dálirek aitsaq, jol apaty 4 aqpan kúni bolǵan. Kúieýi dúnieden ótkennen keiin Saia kúndiz jetkizýshi bolyp jetkizý bóliminde jumys istep, túnde «taksist» bolyp kólik júrgizgen. Marqumnyń artynda anasy, Diana esimdi sińli men tórt balasy qaldy. Ázirge tórt balanyń taǵdyry qalai bolatyny belgisiz. Sebebi marqumnyń sińli olardy qamqorlyǵyna bere me, joq pa, ýaqyt enshisinde... Dese de, bul balalardy óziniń qamqorlyǵyna alý úshin Diananyń baspanasy bolýy tiis. Alaida onyń baspanasy joq, ony satyp alatyn múmkindigi de joq. Oǵan kómek retinde arnaiy esepshot ta ashyldy. Bul týraly qoǵamdyq belsendi Aijan Hamit jazdy. Ol janashyr jandardyń Diana Esengeldiden basqaǵa aqsha jibermeýin eskertti.
Páter jáne ár balaǵa 100 myń teńge
Tórt balanyń taǵdyry eshkimdi beijai qaldyrmady. Kómek qolyn sozǵan jandardyń ishinde Qazaq Stroy-diń iesi Nurlan Artyqbaev bar. Ol aýmaǵy – 95 kv. m, 3 bólmeli páterdi marqumnyń januiasyna syiǵa tartty. Sonymen qatar, Nurlan Artyqbaev kámelet jasyna tolǵanǵa deiin ai saiyn ár balaǵa 100 myń teńgeden tólep turýdy uiǵardy. Onyń aitýynsha, bul jai ǵana materialdyq kómek emes, olardyń eshkimge kereksiz bop qalmaǵannyń belgisi dep sanaidy.
«Bul oqiǵany estigende, beijai qarap otyra almaitynymyzdy túsindim. Olarǵa biz áke-sheshesin qaitaryp bere almaimyz, biraq bolashaǵynyń jarqyn bolýyna atsalysa alamyz ǵoi. Biz – qazaqpyz, bizdiń kúshimiz aýyzbirshilikte, osyndai qiyn sátte bir-birimizge qol ushyn berip, qoldai bilýimizde. Osy shańyraq balalarǵa berekesimen kelsin, al bizdiń kómek olarǵa ómirde jaqsy adamdardyń baryna sensin», – deidi Nurlan Artyqbaev.
Sóitip, úidiń kilti men sertifikaty birden tabystaldy.
Ákimdik páter bermeý úshin qoqań-loqqy kórsetkeni ras pa?
Esterińizge salsaq, marqum Saianyń kúieýi Erkebulan Sydyqbaev 32 jasynda, 2022 jyly qańtar oqiǵasy kezinde kóz jumady. Ol dál sol kúni anasyn jumystan alyp qaitpaq bolady. Almatynyń bir basynan ekinshi basyna bara jatqanynda oǵan qańǵyǵan oq tigen. Ólim men ómirdiń ortasynda arpalysqanymen dárigerler Erkebulandy aman alyp qala almai, aýrýhanada kóz jumady. Bul týraly jýrnalist Aian Qalmurat óz paraqshasynda jazady.
«Búgin óte aýyr habar estidim. Myna sýrettegi Erkebulan — Qańtardyń kezdeisoq qurbany. Mamasyn dúrbeleń kúni jumystan kútip alýǵa shyqqanda oqqa ushqan. Kólik jóndep, taksi aidap júrgen qarapaiym jigit edi. Artynan úsh bala qalǵan. Kelinshegi Saianyń aiaǵy aýyr edi. Birer aida bosandy. Saia «qyzymnyń atyn kúieýim qalaǵandai «Erke» dep qoidym degen. Keiin Saianyń tórt balany qalai jalǵyz jetkizip júrgenin syrttai estýshi edim. Túrli jumys istep, páter jaldap, tirshilik úshin kúresip… Al keshe Saia jol apatynan kóz jumdy degen habar jetti. Ne degen ádiletsizdik bul?! Ishim kúiip barady», –dep eske aldy ol.
Ol ýaqytta – Marqum Saia tórtinshi balaǵa ekiqabat kezi eken. Jergilikti ákimshilik áýelde olarǵa úi berýge ýáde beredi. Úsh jyl sottasyp júrip, áreń degende ákimdik jalǵa aqy tóleitin bolady. Sol ýaqytta olar Saialyda bir bólmeli páterdi jaldap turǵan. Áli de bolsa, oqiǵanyń aq-qarasy belgisiz. Alaida Aijan Hamittiń aitýynsha, Saiany «Sizderge úi beremiz» dep ákimdikke Dáýren Daiyrbaev degen bireý shaqyryp alǵan. Keiin ony kabinetine kirgizip alǵan soń qorqytyp, kúshpen sottan bas tartqyzǵan. Osydan keiin ol ákimdikke jolamaǵan. Sodan kún kóris úshin «taksovat» etken desedi.
Jýrnalist Gúlmira Ábiqai marqum Saianyń janazasynda almaty ákimdigi úsh bólmeli páterdiń kiltin tabystaǵanyn aitty.
«Búgin Almaty jurty 4 balanyń anasy Saia Baýyrjanqyzyn sońǵy saparǵa shyǵaryp saldy. Kesheden beri marqumnyń naǵashy ápkesimen bailanysyp, jaǵdaidy bilip otyrǵandyqtan jumysqa zaýqym soqpady. Qazaly áýletke kóńil aitýǵa keldim. Ýlap-shýlap jylaǵan jurt qarasy kóp. Kóbisin qandy qańtar biriktirgen. Árqaisy sol qańtarda asyraýshysynan, jarynan, ulynan aiyrylǵan jarym jandar. Qańtarda kúieýine oq tiip óldi, ózi kólik apatynan qaitys bolǵan Saia men Erkebulannyń 4 balasy tuldyr jetim qaldy. Balalarǵa qaza jaily búgin estirtti, 9 jasar bala ne túsinsin “Mamamdy alyp kete me?” dep burtidy da qoidy. Kishkentailary oiyn balasy. Qulynymdap ańyrap ana, kúńirenip dala qaldy. Qosh bol, Saia! Denesin kúieýi Erkebulannyń janyna jerledi.
Eń ókinishtisi, qazaly jiyn barysynda Almaty ákimdiginen kelgen adam ata-anasyz qalǵan balalarǵa 3 bólmeli páterdiń kiltin tabys etti. Júregim-ai, – dep jazdy Gúlmira Ábiqai.
