Qaraǵandy oblysynyń Ulytaý aýdanynda týrizmdi damytýǵa ǵana emes, sonymen qatar jergilikti turǵyndardyń ómir súrý sapasyn arttyrýǵa da erekshe kóńil bólinip otyr.
Bul týraly óziniń Facebook paraqshasynda Qaraǵandy oblysynyń ákimi Jeńis Qasymbek jazdy, dep habarlaidy "Ult aqparat".
«Ulytaýǵa sapar barysynda fermerlermen kezdesip, sýbsidiia máselesin talqyladyq. Birqatar máselelerdi Aýyl sharýashylyǵy ministrligi deńgeiinde sheshý qajet. Aldaǵy kúnderi taǵy da Qaraǵandyda kezdesýge ýaǵdalastyq.
Aýdan ortalyǵynda tórt kóppáterli turǵyn úidiń qurylys alańdarynda boldym. Qurylys jeke investitsiialar esebinen júrgizilýde. Turǵyn úiler satyp alý quqyǵymen jalǵa beriletin bolady.
Ózderińiz biletindei, oblysta aýyldyq jerlerde 32 feldsherlik-akýsherlik pýnktti salý josparlanǵan. Onyń altaýy Ulytaý aýdanynyń aýyldarynda ashylady.
Sondai-aq, týristik áleýetti damytý úshin QR mádeniet, týrizm jáne sport ministrligi salǵan Sapar ortalyǵyna bardym. Nysanda ashana, májilis zaly, qonaq úi ornalasqan. Jalpy, ortalyq bir ýaqytta 200 adamdy qabyldai alady.
Sonymen qatar, «Joshy han» tarihi-mádeni kesheniniń qurylys alańynda boldyq. Mundaǵy jumystar 90% oryndaldy.
Qazirgi ýaqytta ishki árleý, aýlany abattandyrý, kógaldandyrý jáne injenerlik syrtqy jelilerdi qosý boiynsha jumystar júrgizilýde. Qurylys jumystary tamyzda aiaqtalady»,-deidi oblys ákimi.
Keshen Altyn Orda dáýirin zertteýge arnalǵan ǵylymi ortalyq qana emes, sonymen qatar Ulytaýdyń kieli oryndaryn, etno-aýyl, Jezqazǵan qalasynyń tarihi-arheologiialyq jáne tarihi-óndiristik murajailaryn bailanystyratyn biregei týristik marshrýttyń bir bóligine ainalady.
«Qarsaqbai kentinde agrotehnikalyq kolledjdi jóndeý jumystarynyń sapasyn tekserip, Jumyspen qamtý-2021 jol kartasy boiynsha salynyp jatqan 100 oryndyq Dene shynyqtyrý – saýyqtyrý kesheniniń qurylys alańynda boldym. Kúzge qarai sport keshenin paidalanýǵa berýdi tapsyrdym»,-dep jazdy Jeńis Qasymbek.
