Áleýmettik jelide Qazaqstannyń halyq jazýshysy Muhtar Shahanovtyń dúnieden ótkeni týraly habar tarady. Aqynnyń "Jalyn" jýrnalyndaǵy orynbasary Qudiiar Bilál bul aqparattyń jalǵan ekenin habarlady, dep jazady "Ult aqparat".
"Kei aǵaiyn áleýmettik jeli betinde "Muhtar Shahanov dúnieden ozypty" dep habar taratýda. Basyn ashyp aitaiyq, jańsaq habar. Aǵamyz din aman. Qazir ǵana sóilestik. Sondyqtan ótirik aqpardy taratýdy toqtataiyq", - dep jazdy Bilál Facebook paraqshasynda.
Aita keteiik, buǵan deiin Muhtar Shahanovtyń eki ókpesi qabynyp, úshinshi shildede aýrýhanaǵa túskeni habarlandy.
"2 shildede Muhtar Shahanovtyń týǵan kúni boldy. Sony redaktsiiada kishigirim atap óttik. Onyń aldynda shamaly mazasy bolmai júrdi, biraq qatty aýyrǵan joq. Jótel sekildi aýrýdyń belgileri bolmady. Ózi únemi qozǵalysta júretin adam bolǵan soń keiingi kezderi kóp demalǵysy kele berdi", - degen bolatyn Shahanovtyń orynbasary.
Keiinnen Qudiiar Bilál aýrýhanada Shahanovqa erekshe kóńil bólinbei jatqanyn aityp Memleket basshysy Qasym-Jomart Toqaevqa hat jazdy.
Ol Muhtar Shahanov Almaty qalasyndaǵy "Qalqaman" (№7 qalalyq klinikalyq aýrýhana – Sputnik) aýrýhanasynda emdelip jatqanyn aitty. Aýyrǵanyna bir aptadan asqanyn, emdeý sharalary áli kúnge deiin oń nátije bermegenin jetkizgen bolatyn. Qudiiar Bilál aýrýhana ákimshiligi Muhtar Shahanovty aýrýǵa shaldyqqankóp adamnyń biri retinde ǵana qabyldap jatqanyn aitty.
Aita keteiik, Muhtar Shahanov 1942 jyly 2 shildede Ońtústik Qazaqstan oblysy Otyrar aýdanynda dúniege kelgen. Shahanov 2004 jyldan beri "Jalyn" jýrnalynda bas redaktor qyzmetin atqaryp keledi.
