Byltyr memlekettik satyp alý kezinde shartty únemdelgen qarajat 448 mlrd teńgeni qurady. Bul týraly onlain rejimde halyq aldynda esep berýi kezinde Qarjy ministri Erulan Jamaýbaev málim etti, dep habarlaidy "Ult aqparat".
«Memlekettik aktivterdi basqarýǵa qatysty toqtalsaq, 2020 jyly Jekeshelendirýdiń 2016-2020 jyldarǵa arnalǵan keshendi jospary aiaqtaldy. Byltyr 101,1 mlrd teńgege 12 obekt satyldy. Nátijesinde, memlekettiń ekonomikadaǵy úlesi 2015-2020 jyldar arasynda jalpy ishki ónimge qatysty 19,1 paiyzdan 15 paiyzǵa deiin qysqardy», - dedi E. Jamaýbaev.
Osy oraida ol jekeshelendirý rásimderin ońailatý jáne jedeldetý maqsatynda tiisti zańnamalyq aktiler qabyldanǵanyn eske saldy.
Sonymen qatar vedomstvo basshysy memlekettik satyp alý protsesine toqtaldy.
«Biýdjetti atqarýdyń mańyzdy quramdas bólikteriniń biri memlekettik satyp alý bolyp sanalady. Búginde onyń búkil protsesi avtomattandyrylǵan. Veb-portalda 109 myńnan astam ónim berýshi men 24 myń tapsyrys berýshi tirkelgen. Memlekettik satyp alý kólemi 2019 jylmen salystyrǵanda 30 paiyzǵa ósip, 5,9 trln teńgeden astam somany qurady. Ótken jyly memlekettik satyp alý kezinde shartty únemdelgen qarajat 448 mlrd teńgeni qurady. Jalpy sońǵy 3 jylda únemdeý 1 trln teńgeden astam boldy», - dedi ministr.
