Foto: Pexels.com
Jeke mektepterde oqityn az qamtylǵan otbasy balalaryna memleket tarapynan oqý quraldaryn alýǵa qarjylai qoldaý kórsetiledi, dep habarlaidy Ult.kz.
Búgin QR Parlamenti Senaty bilim jáne bala quqyqtaryn qorǵaý máseleleri jónindegi zańdy maquldady. QR Oqý-aǵartý ministrligi bastamashylyq etken jańa zań jobasynda jekemenshik mektepterde osal otbasylar sanatyndaǵy balalarǵa áleýmettik kómek kórsetýdi engizý kózdelgen.
Zań jobasynda bes novella usynyldy, onyń bireýi jekemenshik mektepterde oqityn az qamtylǵan otbasylar balalaryna qatysty. Onda eń tómengi kúnkóris deńgeiinen tómen emes mólsherde qajetti mektep kerek-jaraqtarymen qamtamasyz etýge baǵyttalǵan normalar kózdelgen.
«Buǵan deiin kómek tek memlekettik mektepterdiń oqýshylaryna ǵana beriletin, al endi jeke mektepterde oqityn balalar da osyndai kómek alatyn bolady. Bul mekteptiń menshik nysanyna qaramastan, barlyq balalar úshin bilim berýdiń teń múmkindikterin qamtamasyz etýge baǵyttalǵan mańyzdy qadam», - dep atap ótti QR Oqý-aǵartý vitse-ministri Edil Ospan.
Aita keteiik, biylǵy jyly áleýmettik osal otbasylardan shyqqan 510 myńnan astam bala memleketten kiim-keshek, oqý quraldaryn satyp alý úshin qarjylai qoldaý aldy. Buǵan deiin Oqý-aǵartý ministrligi kómek kórsetý mehanizmin jaqsartý maqsatynda ata-analardyń esepshottaryna qarajat aýdarý sharalaryn engizgen edi. Kómek alý úshin ata-ana aldymen balasynyń oqityn mekemesine tiisti ótinish berýi qajet.
