2020 jyly eldegi memlekettik qyzmetterdiń sapasyna júrgizilgen qoǵamdyq monitoring qorytyndysy jariialandy, dep habarlaidy QazAqparat.
Oǵan sensek, saýalnama ásirese Shyǵys Qazaqstan, Mańǵystaý jáne Batys Qazaqstan oblystaryndaǵy turǵyndardyń jedel járdem qyzmetiniń sapasyna kóńili tolmaitynyn kórsetken.
«2020 jyly Qazaqstanda jedel meditsinalyq járdemniń 330 stansasy jumys istegen. 2019 jyly olardyń sany 318 bolǵan eken. Bir jylda osy 330 stansa 7,5 mln adamǵa qyzmet kórsetken. Bul 2019 jylǵa kórsetkishten 11,2% az. 2020 jyly ár 1000 adamnyń 398-i jedel járdem qyzmetine júginse, 2019 jyly 1000 adamnyń 451-i jedel járdem paidalanǵan», - dep jazady Energyprom.kz.
Saýalnama jedel járdem qyzmetiniń byltyrǵy jai-kúiin taldaý úshin jasalǵanyn atap ótý kerek. Memlekettik qyzmet kórsetý sapasyn baǵalaýdyń qoǵamdyq monitoringi azamattardyń jedel járdem jumysyna qanaǵattaný kórsetkishi 82,5% degen qorytyndy shyǵarǵan. Kórsetilgen qyzmettiń ortasha baǵasy – 5-4,69 ball.
Eldegi jedel meditsinalyq kómek kórsetý erejesi boiynsha feldsherlik jáne mamandandyrylǵan brigadalar naýqasqa jetý ýaqyty dispetcherden shaqyrtý alǵan sátten bastap 10-60 minýt arasynda bolýy kerek. Taldaýdyń málimetinde sensek, shaqyrtýlardyń 85,4%-ynda osy ýaqyt shegi saqtalǵan. Al 10,4% jaǵdaida kútý ýaqyty bir saǵattan asyp ketken. Respondentterdiń 4,2%-y jedel járdemdi qansha kútkenin esine túsire almaǵan.
Saýalnamaǵa qatysýshylardyń arasynda jedel járdemdi 4 saǵat, tipti 5 kún kútýge týra kelgenin aitqandar da bolypty.
«Respondentterdiń 27,7%-y jedel járdemniń 10 minýt ishinde, 25,8%-y 15 minýt tóńireginde, 23,9%-y jarty ishinde, 8% --y bir saǵatta kelgenin ataǵan. Respondentterdiń 94,8%-y jedel járdem brigadasy naýqasqa qajetti kómek kórsetkenin, 47,4%-y úide kómek kórsetilgenin, 35,2%-y naýqastyń aýrýhanaǵa túskenin, 13,1%-y naýqasty aýrýhanaǵa jatqyzýdan bas tartylǵanyn, 1,9%-y brigada qajet kómekti kórsetpei ketkenin atap ótti», - dep jazady taldaý avtorlary.
Óńirler arasynda Jambyl jáne Aqtóbe oblystary, Nur-Sultan qalasynyń jedel járdem qyzmetine jaǵymdy baǵa berildi.
Eń tómengi ball Shyǵys Qazaqstan, Mańǵystaý jáne Batys Qazaqstan oblystaryna tiesili.
