"Rio-de Janeiro qalasynda ótip jatqan Olimpiada oiyndarynda aýyr atletikadan qyzdar arasynda 69 kelide óner kórsetetin Jazira Japparqul kúmis júldege ie boldy", - dep habarlaidy Ult.kz tilshisi.
69 keli salmaq dárejesinde synǵa túsken otandasymyz julqa kóterý synynda 115 kelini kóterip, ekinshi orynnan kórindi. Bul synda qytailyq atlet Ianmei Sian 116 kelimen birinshi nátije kórsetti.
Serpe kóterýden jerlesimiz 144 kelini basynan asyryp, taǵy da qytailyq qyzdan keiingi orynnan kórindi. Osylaisha 259 upaimen ekinshi oryndy enshiledi. Al Ianmei Sian 261 upaimen altyn júldeni qanjyǵalady.
Jazira Japparqul 1993 jyly Ońtústik Qazaqstan oblysynyń Arys aýdanynda dúniege kelgen. 8 jasynan bastap aýyr atletikamen ainalysa bastaǵan. Alǵashqy bapkeri Rashit Tólegenov. Qazir de osy bapkerimen jumys jasap keledi.
Ol eń alǵash 58, 63 keli salmaqta Qazaqstan chempiony atandy. Al 2010 jyly 17 jasynda Singapýrde ótken tuńǵysh jasóspirimder arasyndaǵy Olimpiada oiyndarynda qazaq qyzdary arasynan tuńǵysh jeńis tuǵyrynyń eń biik satysynan kórindi. Bul onyń úlken sportqa degen qushtarlyǵyn oiatty. Singapýrde Jazira 63 kelide óner kórsetip, qos saiystyń qorytyndysy boiynsha 205 (90+115) kelini baǵyndyrdy.
2012 jyly Gvatemaladaǵy jasóspirimder arasyndaǵy álem birinshiliginde chempion atandy. Qos saiystyń qorytyndysy - 239 keli (106+133). Al 2013 jyly Japparqul jasóspirimder arasyndaǵy álem chempionatynda kúmis júldeger atandy.
Jazira 2011 jyly alǵash ret eresekter arasyndaǵy álem birinshiligine qatysty. Alaida onda júlde buiyrmady. Qarsylastarynyń barlyǵy kileń myqtylar edi. 2013 jyly da eresekter arasyndaǵy álem chempionatynda baǵy janbady. Alaida, ol 2014 jyly óz elimizde Almaty qalasynda ótken álem birinshiliginde tuńǵysh ret qazaq qyzdary arasynda aýyr atletikadan "álem chempionatynyń kúmis júldegeri" degen ataqqa qol jetkizdi. Onda julqa kóterýden 118 kelini, serpe kóterý básekesinde 144 kelini kóterip, qos saiystyń qorytyndysy boiynsha 262 kelini baǵyndyrdy.
2015 jyly Hiýstonda ótken, Rio Olimpiadasynyń joldamalary sarapqa salynǵan álem chempionatynda taǵy da jeńis tuǵyrynyń ekinshi satysynan kórinip, ekinshi márte álem birinshiliginiń kúmis júldegeri degen ataqqa qol jetkizdi.
Ult portaly
