Tótenshe jaǵdailar ministrligi men jumyldyrylǵan kúshter Batys Qazaqstan oblysyndaǵy sý basqan saiajai ýchaskelerinen aldyn ala 1376 adamdy evakýatsiialap, ýaqytsha ornalastyrý pýnktterine jetkizdi, dep habarlaidy "Ult aqparat" Tótenshe jaǵdailar ministrliginiń baspasóz qyzmetine silteme jasap.
Ýaqytsha ornalastyrý pýnktterinde barlyǵy 1497 adam bar. Qalǵan azamattar týystarynyń úilerine ornalastyryldy.
"Oral qalasynyń mańyndaǵy sý basqan saiajai alaptarynyń aýmaǵynda izdestirý-qutqarý jumystary jalǵasýda. Áýede tikushaq jumys isteýde. Osy saǵatqa deiin 100-den astam úi janýary evakýatsiialandy. Jumys jalǵasýda", – dep habarlady tótenshe jaǵdailar departamentiniń baspasóz qyzmeti.
Qazirgi ýaqytta Batys Qazaqstan oblysynyń evakýatsiialyq pýnktterinde 2 300 adam, onyń ishinde 985 bala bar. 4 925 úi janýary qaýipsiz jerlerge aidaldy.
Buǵan deiin Jaiyq ózeninen tasyǵan sý Oral mańyndaǵy saiajailardy basyp qalǵanyn habarlaǵan edik.
BQO, Qyzylorda oblysy, Astana qalasy TJD qutqarýshylary jáne TJM 28237 áskeri bóliminiń áskeri qyzmetshileri oqiǵa ornyna kelgeni aitylady. Adamdar aldyn ala evakýatsiialanǵan.
"Alaida, jergilikti turǵyndar arasynda úilerinen óz erkimen ketýden bas tartqandar da bar. Jergilikti politsiia qyzmetkerleri oqiǵa ornynda jumys atqarýda", – dep qosty TJM.
