Foto: ashyq derekkóz
Elimizde jumys isteitin jastarǵa arnalǵan jaldamaly turǵyn úi baǵdarlamasy toqtatylatyny belgili boldy. Bul týraly Premer-ministrdiń orynbasary – Mádeniet jáne aqparat ministri Aida Balaeva málimdedi, dep habarlaidy Ult.kz.
Ministrdiń aitýynsha, atalǵan baǵdarlama Astana, Almaty jáne Shymkent qalalarynda júzege asyrylyp, 10 myńnan astam jas mamandy baspanamen qamtyǵan. Baǵdarlama aiasynda jastarǵa turǵyn úi satyp alý quqyǵynsyz, ýaqytsha jáne qoljetimdi baǵamen jalǵa berilgen. Ai saiynǵy tólem 5 myńnan 15 myń teńge aralyǵynda bolǵan.
Baǵdarlamanyń basty maqsaty – jas mamandarǵa ýaqytsha baspana usynyp, óz úiin satyp alýǵa bastapqy jarna jinaýǵa múmkindik berý edi. Osy ýaqyt ishinde turǵyn úi berý merzimderi ózgergenimen, negizgi qaǵidat – satyp alý quqyǵynsyz jalǵa berý saqtalǵan.
Aida Balaevanyń sózinshe, keibir azamattardyń páterdi ózinde qaldyrýǵa niet bildirgeni túsinikti. Alaida mundai sheshim zań talaptaryna jáne barlyq qatysýshylar úshin teń jaǵdai qaǵidatyna qaishy keledi.
Sonymen qatar memleket tarapynan jastardy qoldaý jalǵasady. Otbasy bankpen birlesip 17 óńirde jeńildetilgen ipotekalyq baǵdarlamalar iske qosylyp, olardyń aiasynda 12 myńǵa jýyq jas baspanaly bolǵan. Onyń ishinde 1,6 myńnan astamy osy jaldamaly turǵyn úi baǵdarlamasynyń qatysýshylary.
Jastar sondai-aq «Otaý», «Naýryz» jáne «Naýryz Jumysker» baǵdarlamalary arqyly da turǵyn úige qol jetkizip otyr. Qazirgi tańda maquldanǵan ótinimderdiń 62%-y 35 jasqa deiingi azamattarǵa tiesili.
2026 jylǵy 27 naýryzdaǵy buiryqqa sáikes, jumys isteitin jastarǵa satyp alý quqyǵynsyz jalǵa beriletin turǵyn úi berý qaǵidalarynyń kúshi joiylyp, baǵdarlama resmi túrde toqtatylady.
Ministr qazirgi jalǵa alýshylar kelisimshart merzimi aiaqtalǵanǵa deiin páterde tura alatynyn, al merzimi aiaqtalǵandar belgilengen tártipke sáikes áreket etýi tiis ekenin atap ótti.
Bosatylatyn turǵyn úi qoryn odan ári paidalaný máselesin jergilikti atqarýshy organdar turǵyn úi zańnamasyna sáikes sheshetin bolady.
