Foto: Ult.kz
Almatyda belgili IT maman Meiirjan Áýelhanulynyń «Jasandy intellekt álippesi (Qazaqsha 1000 + prompt) atty kitabynyń tusaýy kesildi, – dep habarlaidy Ult.kz.
Atalǵan kitap XXI ǵasyrdyń tehnologiialyq revoliýtsiiasy aiasynda jasandy intellekttiń damýyn, onyń qoǵam men ekonomikalyq salalarǵa tigizetin áserin jáne bolashaǵyn jan-jaqty taldaidy. Sonymen qatar, oqyrman jańa dáýirdiń innovatsiialyq sheshimderi men praktikalyq jattyǵýlary arqyly JI negizderin, qoldaný joldaryn, sondai-aq etikalyq jáne qaýipsizdik aspektilerin eskere otyryp, zamanaýi tehnologiialardy tiimdi paidalanýdy meńgeredi.
Foto: Ult.kz
Myń danamen taraǵan kitap avtorynyń aitýynsha, jyl sońyna deiin taralymdy arttyrý josparlanǵan.
«Jyldyń sońyna deiin 25-30 myń dana basyp shyǵarsaq degen oiymyz bar. Negizgi mazmuny, aldyńǵy 100 beti jasandy intellekt degen ne, jasandy intellekt etikasy, jasandy intellektpen birge kelgen ártúrli máseleler qamtylǵan. Ózderińiz bilesizder, jasandy intellektiń ómirge kelýimen jalǵan aqparat ta kóp tarai bastady. Sol jalǵandy qalai ajyratamyz jáne jasandy intellektiniń bolashaǵy qandai bolady, jasandy intellekt týraly zańdar qalai qabyldanýy kerek degen siiaqty uǵymdar aldyńǵy júz betinde qarastyrylady. Keiingi eki júz beti jiyrma jeti salaǵa arnalǵan prompttar. Bul eńbektiń shyǵýdaǵy eń basty maqsaty jalpy qazaq tilindegi oqyrmanǵa jasandy intellekt uǵymyn IT salasynyń tilinde emes, ǵylym tilinde emes, qarapaiym tilde túsindirý», – deidi Meiirjan Áýelhanuly.
Foto: Ult.kz
Jiynda mediamenedjer Nurjan Jalaýqyzy, Almaty qalasy ákiminiń keńesshisi Mamai Ahet, kitaptyń redaktory Qainar Oljai, belgili jýrnalist Serik Abas Shah pen aqyn Ulyqbek Esdáýlet kitaptyń tusaýkeser rásimin jasady.
Foto: Ult.kz
Ulyqbek Esdáýlet, aqyn:
Bul kompiýterlik baǵdarlamanyń, tehnologiianyń damyp ketken zamany boldy. Jasandy intellektiniń jemisin de kórip jatyrmyz, qaýiptiligi de aitylyp jatyr. Degenmen jasandy intellekt jazýshylyq sheberlikke áli jete qoiǵan joq. Biraq túptiń túbinde jetýi de múmkin. Óitkeni jasandy intellektiniń múmkindigi sheksiz ekenine kún saiyn kóz jetip keledi. Qazirdiń ózinde JI arqyly hat jazysamyz. Sondyqtan kelesheginen úlken úmit kúttirip otyrǵan jigitterge jemis tileimin. Eńbek qutty bolsyn!
Foto: Ult.kz
Nurjan Jalaýqyzy, mediamenedjer:
Búgin shynymen de tarihi oqiǵa, Qazaqstan qoǵamy úshin, sandyq júiede alǵashqy qadam. Sondyqtan Meiirjan sizdi quttyqtaimyn! Jalpy jasandy intellekt degen ómirimizge etene ene bastady ǵoi. Alpystan jańa asqandar keide jasandy intellektiden góri, tabiǵi intellektige júginemiz. Al úidegi kishkentai balalar qazir eshqashan teledidardy qolmen qospaidy, jaryqty qolmen óshirmeidi. Osy kitapta jazylǵandai, bárin dybystyq jasandy intellektimen atqarady. Bul búgingi kúnniń shynaiy shyndyǵy deýge bolady. Sondyqtan bárimiz osyǵan daiyn bolaiyq. Qadamdaryńyz qutty bolsyn!
Foto: Ult.kz
Qainar Oljai, redaktor:
Osy kitapty redaktsiialaýdy suraǵan kezde aldymen sholyp shyqtym. Qarasam, bir qate joq, búkil terminderde, qara sózde áriptik qate joq. Alǵashynda súisinip otyryp oqydym. Biraq ekinshi bólimine kelgende meniń eńbegim qajet ekenin, maǵan nege tapsyrylǵanyn túsindim. Bul bólimde jasandy intellektige myń tapsyrma bar. Qazaq tildi intellekt áleminde jasandy intellektiniń keńinen qatesiz bolýyna, qazaqtyń sintaksisiniń sóilem qurylýyna úlken paidasy bolady. Osy arqyly jasandy intellektini myńdaǵan adam qoldansa, jasandy intellekt qazaq tilin ózi ǵana tereń meńgerip qoimai, paidalanýshysyna da qazaq tili júieli bolýyna múmkindik beredi. Jasandy intellekt jýrnalisterge óte ońai boldy, biraq jasandy intellektige qiyn boldy. Óitkeni qazaqta bir sózdiń birneshe maǵynasy bar. Ondai kezde jasandy intellekt maǵynany aiyrmai qalady. Sondyqtan jasandy intellektini paidalaný kerek, biraq jetik paidalanǵan durys.
Aita keteiik, Meiirjan Áýelhanulynyń «Jasandy intellekt álippesi (Qazaqsha 1000 + prompt) atty kitaby 1000 dana taralymmen, «Balaýsa» baspasynda basylyp shyqqan.
Aqbota Musabekqyzy
