Tótenshe jaǵdailar ministrliginiń basshysy Iýrii Ilin Jambyl oblysy Baizaq aýdanyndaǵy áskeri bólimniń qoimasynda bolǵan jarylystardyń sebebi áli tolyq anyqtalmaǵanyn, sondyqtan qandai da bir qorytyndy jasaýǵa áli erte ekenin aitty, dep habarlaidy Sputnik Qazaqstan.
"Dál qazir tergeý sharalary júrip jatyr. Men qol astymdaǵy qyzmetkerlerdiń sózine qatysty eshteńe aita almaimyn. Degenmen bizde naqty tártip bar ekenin rastaimyn. Máselen, órt sóndirýshiler belgili bir nysanǵa barǵanda aldymen sol nysannyń iesinen mán-jaidy suraidy. Ol qaýip-qaterdiń bar-joǵyn aitýy kerek", - dedi Ilin aibat.kz basylymyna bergen suhbatynda.
Ministrdiń aitýynsha, órt sóndirýshilerge Qorǵanys ministrliginiń qoimasynda jarylatyn zat joq dep habarlaǵan.
"Ol qoimada órt shyqqany jáne trotil shashkalary bar ekeni rastaldy. Al qorǵanys ministrliginiń nusqaýlyqtary men talaptaryna sáikes, ondai shashkalar detonatorsyz saqtalady. Sol sebepti eshqandai qaýip bolmaǵan", - dep atap ótti Ilin.
Onyń sózine qaraǵanda, dál qazir tergeý organdary trotildiń qalaisha tutanyp ketkenin anyqtap jatyr. Osy oraida ministr "áskeriler órt sóndirýshilerdi aldap, qashyp ketti" degen pikirmen kelispeitinin aitty.
"Qaitys bolǵandardyń arasynda qorǵanys ministrliginiń qyzmetkerleri de, tótenshe jaǵdailar ministrliginiń qyzmetkerleri de bar. Sondyqtan árbir adam óziniń qyzmettik mindetin oryndady dep oilaimyn", – deidi Ilin.
Qorǵanys ministrligi ne deidi?
№28349 áskeri bólim komandiriniń orynbasary, podpolkovnik Rýslan Jylqybaevtyń aitýynsha, áskeri qoimada injenerlik oq-dáriler bolǵan. Ondai snariadtar jarylmaýǵa tiis.
"Tehnikalyq turǵyda ondai oq-dáriler jarylmaýy kerek. Sol sebepti áskeri bólimniń órt sóndirýshileri tilsiz jaýdy aýyzdyqtaýǵa sheshim qabyldaǵan. Osy jumysqa tótenshe jaǵdailar departamentiniń órt sóndirýshileri de tartyldy", - deidi Jylqybaev.
Onyń aitýynsha, jarylystardyń sebebin arnaiy komissiia anyqtaidy. Onyń quramyna kásibi sarapshylar kirgen.
"Áskeri bólimniń órt sóndirý komandasy birden órtti sóndirýge kirisken. Al jeke quramnyń basqa bóligi jaqyn turatyn adamdardy evakýatsiialaýǵa, oqiǵa ornyn qorshaýǵa, áskeri bólimniń basqa da nysandaryn kúzetýdi kúsheitýge tartyldy", - dep túsindirdi Jylqybaev.
"Jarylatyn zat joq dedi"
Buǵan deiin Baizaq aýdandyq №8 órt sóndirý qyzmetiniń mamany Asyl Muhambetjanov Taraz túbindegi jarylystar kezinde adam shyǵyn ne sebepti kóp bolǵanyn aitqan.
"Oqiǵa ornyna birinshi bolyp barǵan biz edik. Aldymen barlaý jasaimyz ǵoi. Sol jerde "starshii kim?" dep surap edim, aǵa leitenant pa, maior ma, sol kisi menmin dedi, jarylatyn zat joq pa dep suradym, jarylatyn eshteńe joq dedi. Videony kórgen shyǵarsyz. Qara tútinniń ishinde órt sóndirýshiler júrdi. Arasynda men de barmyn. Sý berip jattym. Sol kezde jarylatyn zat joq pa dep taǵy suradym. Joq dep jaýap berdi", - dedi Muhambetjanov jýrnalisterge bergen suhbatynda.
Aýrýhanada jatqan tótenshe jaǵdailar qyzmetiniń taǵy bir mamany óz áriptesiniń sózin rastady. Almaz esimdi órt sóndirýshi áskeriler jarylys qaýpi bar ekenin aitpaǵanyn jetkizdi.
