Japoniianyń burynǵy premer-ministri Sindzo Abe 8 shildede jasalǵan qastandyqtan soń aýrýhanada kóz jumdy. Bul týraly japoniialyq basylymdar men halyqaralyq agenttikter habarlady.
Abege búgin Japoniianyń batysyndaǵy Nara qalasynda jurt aldynda sóz sóilep turǵan kezde oq atylǵan. Keiin ony aýrýhanaǵa jetkizgen. Abe jurtty aldaǵy jeksenbi kúni ótetin Senat sailaýyna óz partiiasy atynan qatysatyn kandidatty qoldaýǵa úndep turǵan edi.
Aqparatqa qaraǵanda, Abege Nara qalasynyń 41 jastaǵy turǵyny Tetsýia Iamagami shabýyl jasaǵan. Ol adam óltirmek boldy degen kúdikke ilinip, qamaldy. Aldyn ala aqparat boiynsha, ol eks-premerdi qoldan jasalǵan bytyra myltyqpen atqan. Politsiia qarýdy tárkilegen. Jergilikti BAQ-tyń jazýynsha, Tetsýia Iamagami buryn Japoniianyń teńiz kúshterinde qyzmet etken. Kúdikti ne úshin Abeni atqany belgisiz, qazir politsiia tergeý bastady.
67 jastaǵy Sindzo Abe 2020 jyly premer-ministr qyzmetinen otstavkaǵa ketken. Biraq Japoniianyń basqarýshy liberal-demokratiia partiiasynda yqpaldy tulǵa bolyp qalǵan. Ol Japoniiada eń uzaq ýaqyt premer-ministr (2006-2007 jáne 2012-2020 jyldary) bolǵan edi.
