Japoniiada Qazaqstandy zertteý jónindegi sarapshylar qaýymdastyǵy quryldy, dep habarlaidy "Ult aqparat" QR Syrtqy ister ministrligine silteme jasap.
«Búgin Qazaqstandy zertteý jónindegi sarapshylar qaýymdastyǵyn tanystyrýǵa arnalǵan otyrys barysynda «Búgingi Qazaqstan: sabaqtastyq jáne damý bolashaǵy» taqyrybynda «dóńgelek ústel» ótti. Qaýymdastyq quramyna Qazaqstan men Japoniia arasyndaǵy ekijaqty qatynastardy nyǵaitý úshin zertteýler júrgizýge jáne saraptamalyq-konsýltativtik qoldaý kórsetýge nietti japondyq ǵylymi, akademiialyq jáne isker qoǵamdastyqtar, BAQ jáne ÚEU ókilderi kirdi. Olardyń arasynda Japoniianyń Qazaqstanda ár jyldary qyzmet atqarǵan elshileri, «Vaseda», «Ritsýmeikan», «Teikio» jáne «Mýsashino» ýniversitetteriniń professorlary bar», - delingen aqparatta.
Málim etilgendei, qaýymdastyqtyń alǵashqy otyrysynda japondyq sarapshylar Qazaqstan Respýblikasyndaǵy qazirgi ahýaldy, onyń ishinde koronavirýsqa qarsy kúres pen ekonomikalyq damýdy qalpyna keltirý máselelerin talqylady.
«Qazaqstannyń Japoniiadaǵy Elshisi Erlan Baýdarbek-Qojataev is-sharaǵa qatysýshylardy QR Prezidenti Qasym-Jomart Toqaevtyń halyqqa joldaýynyń negizinde Qazaqstanda ótkizilip jatqan saiasi jáne áleýmettik-ekonomikalyq reformalarmen tanystyrdy.
Ortalyq Aziia úshin biregei bolyp sanalatyn biliktiń sabaqtastyǵy sarapshylar talqylaýynyń basty nazarynda boldy. Egemendi memlekettiń qalyptasýyna zor úles qosqan Qazaqstan Respýblikasynyń Tuńǵysh Prezidenti – Elbasy Nursultan Nazarbaev memlekettiliktiń basty sharttarynyń biri – bilikti konstitýtsiialyq jolmen tabystaýdyń negizin qalady», - dedi QR SIM-nen.
Qazaqstandy zertteý jónindegi sarapshylar qaýymdastyǵynyń tóraǵasy, «Ritsýmeikan» ýniversitetiniń qurmetti professory Kei Karasava baiandama jasaǵan. Ol «Halyq únine qulaq asatyn memleket» tujyrymdamasynyń iske asyrylýyn jáne azamattyq qoǵammen jańa dialog alańy retinde qurylǵan, áleýmettik jáne ekonomialyq turaqtylyqty qamtamasyz etetin – Ulttyq qoǵamdyq keńestiń jumysyn joǵary baǵalady.
Japoniianyń QR-daǵy burynǵy Elshisi (2003-2005 jj.) Tosio Tsýnodzaki ulttyq ekonomikany qoldaý, halyq tabysyn saqtaý jáne epidemiiadan keiingi qalpyna keltirý sharalary boiynsha Qazaqstannyń oń áleýetin atap ótken.
