Almaty qalasynda japsarlas salynǵan úidi buzýǵa kelgen sot oryndaýshysyn uryp tastady. Politseiler oqiǵa ornynan qashyp ketti. Qoqan-loqy kórsetken adamdardyń ishinde tanymal qazaqstandyq boksshy da boldy, dep habarlaidy Sputnik Qazaqstan.
Resmi málimetke sáikes, Bostandyq aýdanynyń soty Vinogradnaia kóshesindegi jeke menshik úige japsarlas salynǵan qurylysty buzýǵa sheshim shyǵarǵan. Sebebi ol nysan durys salynbai, bir jaqqa qarai qisaiyp ketken. Kórshi úige qulaý qaýpi bar. Biraq iesi zańsyz salynǵan úi-jaidy óz kúshimen buzbai qoidy. 4 qazanda sot oryndaýshysy eki politseimen birge sheshimdi oryndaýǵa barǵan.
"Sot oryndaýshysy politseilermen birge úi-jai aýmaǵyna kirgen. Biraq belgisiz bireýler tártip saqshylaryna qaramai, sot oryndaýshysyna qysym jasai bastady. Qoqan-loqy kórsetip, qyzmettik mindetin oryndaýǵa kedergi jasady", - delingen sot oryndaýshylary palatasynyń resmi habarlamasynda.
Biraq sot oryndaýshysy tiisti zańdy daýystap turyp oqyp, sot sheshimin oryndaýǵa kirisetinin málimdedi. Osy kezde Maqsot Ysqaqov degen kisi ony kópshiliktiń kózinshe balaǵattap, sot sheshimin oryndaýǵa jol bermeitinin aitty.
"Ysqaqov sot oryndaýshysyn tunshyqtyrdy. Artynan taǵy kelip, qoqan-loqy jasady. Úi-jaidy buzý jumystaryn toqtatýdy talap etti. Biraq sot oryndaýshysy A.Ermekov oǵan mán bermedi. Osy kezde Ysqaqov búiirinen jáne ókpe tusynan urdy. Politsiia bárin kórip turǵan. Tártip saqshylary qashyp ketti", - deidi sot oryndaýshylary.
Ermekov qylmystyq isti qozǵaýǵa shaǵym túsirdi. Politsiianyń áreketine de aryzdandy. Sebebi olar soqqy jasaǵan adamdy ustaýdan bas tartty.
Al Ysqaqov oqiǵa ornyna bokstan álem chempiony Janqosh Turarovty shaqyrdy. Ol da qoqan-loqy kórsetip, aryzdy qaitarýdy talap etti. Tanymal sportshy sot sheshimin oryndaý jumysyn "shekten shyqqandyq" retinde baǵalap, sot oryndaýshysyna dál sondai "shekten shyqqandyq" jasaimyn dep qorqytty. Qazirgi kezde olar sotqa aryz túsirgen kórshige de qysym jasaýǵa kiriskeni habarlanyp otyr.
Ysqaqov ne deidi?
Sputnik Qazaqstan tilshisi sot oryndaýshysyn urǵan Maqsot Ysqaqovqa habarlasyp, zańdy sheshimdi oryndaýǵa ne sebepti kedergi jasaǵanyn bildi.
"Bul – meniń úiim. Ózim satyp aldym. Al sot sheshiminde men týraly eshteńe jazylmaǵan. Sottyń sheshimi byltyr shyqqan. Úidiń burynǵy iesi sot sheshimi shyqqansha satyp jibergen ǵoi. Men ózim úshinshi adamnan satyp aldym. Oryndaý qujatynda men joqpyn. Ony da aityp kórsettim. Biraq oǵan qaraǵan joq", - deidi Ysqaqov.
Onyń aitýynsha, sot sheshimin oryndaýǵa on adam kelgen. Sot oryndaýshysy oǵan boǵaýyz aitqan. Sodan shydai almai, baýyrdan bir urǵan.
Al "Oqiǵa ornyna Janqosh Turarov ta keldi me?" degen suraqqa: "Men Janqosh Turarovty tanymaimyn", - dep qysqa ǵana qaiyrdy.
Ysqaqov quqyq qorǵaý organdaryna aryzdanyp, Qylmystyq kodekstiń 251-baby ("Jekeshe notariýstardyń, baǵalaýshylardyń, jeke sot oryndaýshylarynyń, mediatorlardyń jáne aýditorlyq uiym quramynda jumys isteitin aýditorlardyń ókilettikterdi teris paidalanýy") boiynsha is qozǵaýdy talap etpek.
Almaty qalalyq politsiia departamenti sot oryndaýshysynan túsken aryz tirkeýge alǵanyn habarlady.
Qazirgi kezde tekseris bastaldy. Sonyń nátijesinde protsessýaldyq sheshim qabyldanady.
