Qazaqstandyq boksshy Jánibek Álimhanuly (4-0, 1 KO) alǵashqy titýldyq aiqasyn ótkizip, jeńiske jetti, dep xabarlaidy "Ult aqparat".
AQSh-tyń Los-Andjeles qalasynda bolǵan jekpe-jekte Jánibek Álimxanuly Kristian Olivaspen (16-4, 13 KO) judyryqtasty. Al sarapqa birden eki titýl - orta salmaqtaǵy WBO Global men WBC Continental Americas belbeýleri salyndy. Birinshi raýndta eki boksshy bir-birin zerttep júrdi. Jánibek Álimxanuly sheginip júrse de, birneshe ret dál soqqy jasai bildi. Kristian Olivas bolsa, eki qolyn túsirmei, barynsha qysym kórsetýge tyrysty. Alaida qazaq boksshysy jyldam djebterimen qarsylastyń qorǵanysyn ońai buzyp, tipti úshinshi raýndta ashyq shabýylǵa kóshti. Ádemi apperkottary da ótti.
Osydan keiin Jánibek Álimxanulynyń boksynda erkindik sezile bastady. Qarsylasyn ainalyp júrip, soqqynyń astyna aldy. Seriialyq soqqylardyń qatty bolǵany sonsha, Kristiannyń artqa sheginip, sál táltirektep qalǵany baiqaldy. Osylaisha, barlyq on raýndta Jánibek Álimxanulynyń basymdyǵy aiqyn kórindi, jyldamdyǵy da baiaýlaǵan joq.
Ádil qazylardyń sheshimimen qazaq boksshysy jeńimpaz atanyp, eki birdei belbeýdiń iegeri atandy. Aita ketken jón, Jánibek Álimxanuly kásibi bokstaǵy alǵashqy 10 raýndyq jekpe-jegin ótkizdi.
Ol Vasilii Lomachenko - Entoni Krolla arasynda ótken boks keshiniń anderkartynda judyryqtasqan edi.
Eske sala ketsek, buǵan deiin Álimhanuly instagram jelisinde Saýl Alvares, Deniel Djeikobs jáne Demetriýs Andradeniń sýretterin jariialap, "barlyq belbeýdi qaitaryp alǵysy keletinin" jazǵan edi.
