Jańajyldyq merekelerdi ótkizýdegi qaýipsizdikti qamtamasyz etý maqsatynda 15 jeltoqsannan bastap politsiia jáne azamattyq qorǵaý organdarynyń qyzmetkerleri «Pirotehnika» jedel-aldyn alý sharasyn ótkizedi, dep habarlaidy QazAqparat.
Atalǵan shara sertifikattalmaǵan pirotehnikalyq buiymdardyń jáne ruqsat berý qujattarynsyz saýda faktilerin anyqtaýǵa jáne jolyn kesýge baǵyttalǵan.
«Ishki ister ministrligi petardalar men Bengal ottary feierverkterin satyp alý kezinde mindetti túrde ónimniń sertifikatyna nazar aýdarýǵa, pirotehnikany paidalaný erejelerimen tanysýǵa keńes beredi. Ony saqtaý jáne iske asyrý merzimine mán berińiz. Merzimi ótip ketken taýarlardy eshqandai jaǵdaida qoldanýǵa bolmaidy», - dedi Nurdildá Oraz QR IIM baspasóz alańynda ótken brifingte.
Pirotehnikany iske qosý kezinde temeki shegýge qatań tyiym salynady jáne turaqtaǵy kólikterdiń janynda atýǵa bolmaidy. 50 metr radiýsta órt qaýpi bar nysandar bolmaýy tiis.
«Kórermender feierverkten 15-20 metr qashyqtyqta, tútin men buiymdardyń janbai qalǵan bólikteri ushpaý úshin mindetti túrde jel jaǵynan turýy kerek. Otshashýdy qolmen qosýǵa tyiym salynady. Osyndai qarapaiym erejelerdi ustaný ómirińiz ben densaýlyǵyńyzdy, jáne merekelik kóńil-kúidi saqtaýǵa múmkindik beredi. Pirotehnika – órttiń paida bolýyna ǵana emes, adam densaýlyǵyna da eleýli ziian keltirýi múmkin qaýipti qural. Sol úshin pirotehnikalyq buiymdardy paidalaný erejelerin saqtaý qajet», - dedi Oraz.
