Jańa týǵan nárestege JSN jasalmai turyp, ID kod beriletin boldy. Perzenthanalardaǵy bala saýdasyna tosqaýyl qoiý úshin osyndai shara qabyldaý qarastyrylyp jatyr, dep habarlaidy QazAqparat.
Bul týraly QR Ishki ister ministrligi tergeý departamentiniń bastyǵy Sanjar Ádilov ortalyq kommýnikatsiialar qyzmetinde ótken brifingide aitty.
«Men jańa týǵan balalardy basqa adamdarǵa berýge bailanysty kez kelgen operatsiialardyń zańsyz ekendigine azamattardyń nazaryn aýdarǵym keledi. Mysaly, biyl shildede Shymkent soty ózara kelisip, keiinnen jańa týǵan náresteni berý týraly mámileni zańsyz oryndaǵan eki otbasynyń ústinen aiyptaý úkimin shyǵardy. Balanyń biologiialyq anasy týý týraly kýálikte «jubaiy» baǵanynda náresteniń biologiialyq ákesiniń emes, satyp alýshynyń derekterin kórsetken. Keiin ol notariýsta baladan bas tartýdy resimdegen. Bul is boiynsha barlyq adamdar ártúrli jazaǵa tartyldy», - degen Sanjar Ádilov keleshekte osyǵan uqsas jaǵdailar bolmas úshin Ishki ister ministrligi múddeli memlekettik organdarmen birlese otyryp, birqatar uiymdastyrýshylyq-quqyqtyq sharalardy qabyldaǵanyn atady.
Naqty aitsaq, balalardan bas tartýdy notarialdy kýálandyrýǵa jáne olardy úshinshi tulǵalardyń qurýyna kelisýge tyiym salynatyn boldy.
«Bala asyrap alý týraly zańnamany qoldaný praktikasyna prokýrordyń qatysýy mindetteldi. Perzenthanada ádilet organdarynan JSN alynǵanǵa deiin balanyń ID kodyn qalyptastyrý mehanizmi engizilip jatyr», - dedi IIM ókili.
