Jańa oqý jylynda 421 oqýshydan koronavirýs anyqtaldy. Bul týraly QR DSM sanitarlyq-epidemiologiialyq baqylaý komiteti tóraǵasynyń orynbasary Záýre Ahmetova aitty, dep habarlaidy QazAqparat.
«Búginde bilim berý uiymdaryndaǵy sanitarlyq-epidemiologiialyq ahýaldy baqylaý eń basym baǵyttardyń biri bolyp otyr. Oqý jyly bastalǵannan beri 421 syrqattaný jaǵdaiy tirkeldi. Árbir jaǵdaiǵa orai epidemiologiialyq tekserý júrgizildi. Epidemiologiialyq tekserýdiń nátijesinde atalǵan balalardyń demalys kezinde-aq aýyrǵany jáne koronavirýs infektsiiasyn juqtyrǵandarmen qarym-qatynasta bolǵany anyqtaldy», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, osyǵan bailanysta atalǵan balalarmen qarym-qatynasta bolǵan 3 myńnan astam oqýshy tekserýden ótti. Tekserýden ótken oqýshylardyń arasynda 3 balanyń ǵana koronavirýs juqtyrǵany PTR test arqyly anyqtady.
«Bul jumys kúndelikti júrgiziledi. Syrqattaný joǵary shegine jetken 6 tamyzda elimizde 8 325 adam aýyrdy, onyń 651-i - oqýshylar. Iaǵni, koronavirýs infektsiiasynyń bilim berý uiymdarynda taralýyna jol bermeý úshin qatań karantindik is-sharalar qabyldanǵan», - dedi Záýre Ahmetova.
