Astana ákimi Altai Kólginov mektepterdiń jetispeýshiligi máselesin sheshý joldary týraly aitty, dep habarlaidy QazAqparat.
«Halyq sanynyń artýymen birge, jańa mektepterdi iske qosý máselesi de ózekti bola túsedi. Sońǵy 10 jylda elordadaǵy mektepter sany 1,5 esege artqan. Biraq, jańa syn-qaterlerge tótep berý úshin bizge áli jumys isteý kerek. Sebebi halyq sany sońǵy 10 jylda eki esege kóbeidi. Sáikesinshe, áleýmettik infraqurylymǵa – mektep, balabaqsha, densaýlyq saqtaý nysandary men kólikke salmaq túsedi», - dedi Altai Kólginov Qazmedia ortalyǵynda ótken QR BǴM plenarlyq otyrysynda.
Onyń aitýynsha, sońǵy 10 jylda mektep oqýshylarynyń sany eselep artqan.
«On jyl buryn astanada 73 mektep pen 75 myń oqýshy bolsa, biyl 108 mektep jáne qyrkúiek aiynan bastap, 185 myń oqýshy bilim almaq. Sondyqtan, elordany damytýdyń keshendi josparyna sáikes, aldaǵy 5 jylda 40 bilim berý nysany salynady», - dedi ákim.
Ásirese, jańa mektep qurylysyna jeke investorlardy tartý kózdelip otyr.
«Biz investorlarǵa bar jaǵdaidy jasaimyz. Investorlar keńesinde 11 mektep qurylysynyń jeke investor esebinen júrgizýdi maquldadyq. Osydan keiin taǵy 2-3 investor óz qarajatynan mektep turǵyzýǵa niet bildirdi. Eger bul mektepter salynsa, 12 myń oqýshyny mektep ornymen qamtamasyz ete alamyz. Ázirge Nur-Sultan mektepterinde 17 myń oryn jetispeidi», - dedi elorda ákimi.
