20 aqpan kúni Almaty qalasyndaǵy Almaty oblysynyń qyzmet kórsetý jáne tamaqtandyrý salasyndaǵy innovatsiialyq tehnologiialar kolledjiniń májilis zalynda osy oqý ornynyń kitaphana ujymy men respýblikalyq «Syrly qalam» shyǵarmashyl jastar uiymynyń direktory Bekzat Rinatulynyń uiymdastyrýymen «Sara sóz» tanymdyq jobasynyń kezekti keshi ótti. «Jańa ǵasyr jastary jáne baba joly» dep atalǵan kesh qonaǵy «Altyn hanymdar», «Ásem hanymdar – álemdi tańqaldyrǵan ájeler» tobynyń jetekshisi Botan Kereiqulova.
Keshtiń basty maqsaty – jahandaný dáýirinde ómir súrip jatqan jańa ǵasyr jastaryna ulttyq qundylyqtardyń mańyzyn uǵyndyrý, babalar amanatyna adaldyq pen rýhani sabaqtastyqty dáripteý. Baǵdarlama barysynda el bolashaǵy – jastardyń boiynda ulttyq rýh, tektilik, izgilik pen jaýapkershilik qasietterin qalyptastyrý jaiy sóz boldy.
Kesh barysynda Botan Beketbaiqyzy óziniń ómir joly, jetistikke jetý tarihy, ulttyq bolmysty saqtai otyryp álemdik arenada tanylýdyń qyr-syry týraly mazmundy áńgime órbitti. Ol jastarǵa eń aldymen bilim men tártiptiń, tabandylyq pen eńbekqorlyqtyń mańyzyn atap ótti. «Ulttyq tamyrynan ajyramaǵan urpaq qana jahandaný tolqynynda óz ornyn taba alady», – degen oiy stýdentterdiń júregine jol tapty.
Sonymen qatar, qonaq qazaq áieliniń qoǵamdaǵy róli, ana tárbiesi, otbasy qundylyǵy, syrtqy sulýlyq pen ishki mádeniettiń úilesimi jóninde taǵylymdy pikirlerimen bólisti. Sán álemindegi jetistikterimen qatar, ulttyq kiim úlgilerin dáripteý arqyly qazaqtyń dástúrli ónerin halyqaralyq deńgeide nasihattap júrgenin erekshe atap ótti.
Kesh barysynda stýdentter kókeiindegi suraqtaryn qoiyp, erkin pikir almasty. Ashyq formatta ótken suhbat jastardyń belsendiligimen, mazmundy suraqtarymen erekshelendi. Qonaq óz kezeginde árbir jasqa úlken senim artatynyn aityp, biik maqsat qoiyp, adal eńbek etýge shaqyrdy.
Temirlan RAIYMBERGEN,
Almaty oblysynyń qyzmet kórsetý jáne tamaqtandyrý salasyndaǵy innovatsiialyq tehnologiialar kolledjiniń stýdenti
