Tarazdyń túbindegi jarylystar kezinde jaraqat alǵan birneshe órt sóndirýshi aýrýhanadan shyqty, dep habarlaidy Sputnik Qazaqstan 7 arnaǵa silteme jasap.
№2 órt sóndirý bóliminiń qaraýyl basshysy Rýstam Ertaevtyń aiaǵy birneshe jerden synǵan. Oǵan ota jasaldy. Qazirgi kezde jaǵdaiy jaqsy. Sondyqtan dárigerler ony úige jiberýge sheshim qabyldady.
"Ázirshe úide emdelemiz. 4-5 ai kerek deidi. Artynan kóre jatarmyz. Jumys qoi bul. Qudai saqtady. Densaýlyq durys bolsa, jumys istei beremiz", - deidi Ertaev.
Al Jankeldi Raiymberdiń qulaǵyna zaqym kelip, dabyl jarǵaǵy jarylyp ketken. Ol jaǵdaiy jaqsy ekenin aitty. Jankeldi qaza bolǵan áriptesteriniń úiine baryp, kóńil aityp shyǵýdy josparlap otyr.
Órt sóndirýshi Qanat Aitpaev ta úiine oraldy.
"Qazir qudaiǵa shúkir, jaqsy bári. Dabyl jarǵaqtary bir-eki aida qalpyna keledi dedi. Al qalpyna kelmese, Almatyda ota jasaidy", - deidi Aitpaev.
Qanat órt sóndirý qyzmetin jalǵastyrýdy kózdeidi. Osy qyzmetten abyroimen zeinetkerlikke shyǵýdy armandap júr. Biraq anasy qarsy. Jalǵyz uly úshin qatty alańdaidy. Qanattyń óz balalary da bar.
