Jambyl oblysy Talas aýdany ákimdigine qarasty bólimniń sektor meńgerýshisiniń denesi kósheden tabyldy, dep habarlaidy "Ult aqparat".
Talas aýdany politsiiasynyń kezekshi bólimine Qarataý qalasy kóshesinen oq jaraqaty bar belgisiz er adamnyń máiiti tabylǵany týraly habarlama túsken.
Jedel-tergeý toby oqiǵa ornyna kelgennen keiin qaza tapqan adamnyń óz atyna tirkelgen ańshy myltyǵynan ózine oq atqany anyqtalǵan. Bul týraly oblystyq politsiia departamenti habarlady.
«Qabyldanǵan sharalar barysynda qaitys bolǵan adamnyń kim ekeni anyqtaldy, ony týystary tanydy. Ol atalǵan eldi mekenniń turǵyny bolyp shyqty. Ózine qol jumsaý sebebin jáne istiń barlyq mán-jaiyn anyqtaý úshin tergeý organdary Qylmystyq kodekstiń 105-baby 1-bóligi boiynsha sotqa deiingi tergeý amaldaryn bastady» delingen vedomstvo habarlamasynda.
Talas aýdany ákiminiń baspasóz qyzmeti marqumnyń turǵyn úi-kommýnaldyq sharýashylyq, jolaýshylar kóligi jáne avtomobil joldary bóliminiń sektor meńgerýshisi bolyp jumys istegenin rastaǵan.
Qazirgi ýaqytta politsiia departamenti barlyq qajetti sot saraptamasyn taǵaiyndady.
«QR QIJK 201-babyna sáikes tergeý múddesine bailanysty istiń basqa da egjei-tegjeii jariia etilmeidi», - deidi politsiia.
