Jambyl oblysynda Ataýly áleýmettik kómek alýshylar arasynda barlyǵy 5 171 jeke kásipker bolǵan, dep habarlaidy "Ult aqparat".
AÁK alǵan jeke kásipkerler ishinde 259 kásipker kásibin ataýly áleýmettik kómek ala salyp toqtatqany anyqtalǵan. Alaida bul kásipkerlerdiń tizimi oblystyq memlekettik kirister departamentine joldanǵan. Qazirgi kezde tabysy jaily jalǵan aqparat berýshilermen kúres júrgizilýde.
Jambyl oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Timýrjan Nurymbetovtiń aitýynsha, búginde óńirde 37 149 otbasyna, iaǵni 164 559 adamǵa 12,3 milliard teńge kóleminde jańa formattaǵy ataýly áleýmettik kómek berilgen.
«Bul maqsatqa jyl sońyna deiin barlyǵy 21,3 milliard teńge qarastyrylǵan. Onyń ishinde respýblikalyq biýdjetten 20 milliard teńge, jergilikti biýdjetten 1,3 milliard teńge bólinedi. Qazirgi ýaqytta 253 679 adamnan 47 418 ótinish qabyldandy. Bul – jalpy halyq sanynyń 22,5 paiyzyn quraidy», - deidi basqarma basshysy Timýrjan Nurymbetov.
Onyń aitýynsha, ýaqyt óte kele jalǵan aqparat berip járdemaqy alǵanjar anyqtala bastaǵan.
«Ataýly áleýmettik kómek taǵaiyndaýdyń oblystaǵy dinamikasyna qarasaq, járdemaqy alǵan otbasylar sany sáýir aiynda 8 550, mamyr aiynda 10 568-di qurasa, maýsym aiynda qaitadan 5 565 otbasyna azaidy. Iaǵni, ýaqyt óte kele jalǵan aqparat bergender anyqtala bastaǵan. Endi ataýly áleýmettik kómekti shyn máninde kimder alady degen saýalǵa toqtalsaq. 1 qazannan bastap, qujattaryn tapsyratyn azamattardyń ishinen jan basyna shaqqandaǵy tabysy 18 203 teńgeden aspaityndar ǵana qaralady», - deidi Timýrjan Nurymbetov.
