9 sáýirden bastap Jambyl oblysynda karantin rejimi engiziledi. Búgingi tańda oblys aýmaǵy boiynsha 27 blokpost ornatylǵan, onyń ishinde Taraz qalasynda 7 blokpost qoiylǵan. Olarda politsiia, meditsina jáne áskeri qyzmetshiler qyzmet atqarýda, dep habarlaidy "Ult aqparat" oblys ákimdigine silteme jasap.
Esterińizge sala keteiik, aimaqta koronavirýsqa qatsty 45 jaǵdai tirkelgen, onyń ishinde 11 adam shekara beketinen ótkende, al 6 jolaýshy Deliden kelgen áýe reisinen anyqtalǵan. Taraz qalasynda 5 oqiǵa, Qordai aýdanynda – 18, Merki aýdanynda – 2, Shý, Moiynqum jáne Jambyl aýdandarynda – bir-bireýden tirkelgen.
Osy oraida, 2020 jylǵy 9 sáýir saǵat 00:00-den bastap Jambyl oblysynyń aýmaǵynda jáne oblystyń barlyq eldi mekenderinen kez kelgen kólik jáne azamattardyń kelýine jáne shyǵýyna tyiym salynady. Tek tómendegi jaǵdailarda ǵana ruqsat etiledi:
- meditsinalyq jáne sanitarlyq-epidemiologiialyq qyzmet mamandary, avariialyq-qutqarý jáne kommýnaldyq qyzmetkerler, quqyq qorǵaý organdary;
- farmatsevtikalyq kompaniialardyń, qyzmettik jáne jeke avtokólikterde otbasy músheleri jáne bóten tulǵalarsyz meditsinalyq mekemelerdiń jumys isteýin qamtamasyz etetin zerthanalardyń qyzmetkerleri men mamandary:
- kóktemgi egis jáne basqa da aýyl sharýashylyǵy jumystaryn júrgizý úshin qajetti tulǵalar men avtokólik quraldary;
- jerleý rásimi kezinde máiitti tasityn 3 kólikten aspaityn jáne salt-joralǵylardy atqarý qyzmetkerleri men marqumnyń jaqyndaryn qosqanda 10 adamnan kóp emes tulǵa, tiisti anyqtama qujattary bolǵan jaǵdaida:
- turǵylyqty jerine oralý úshin keletin/ketetin adamdar jáne meditsinalyq kórsetkishter boiynsha ketetin jáne keletin tulǵalar;
- jeke tulǵalar men avtokólik quraldary, jedel shtabtyń sheshimine sáikes (jedel shtab ruqsat berý tártibin anyqtaidy);
- Taraz qalasynan shyqqan jaǵdaida meditsinalyq kartadan úzindi kóshirme boiynsha karantindik oqshaýlaýdan ótken basqa óńirlerdiń turǵyndary men shet memleketterdiń azamattary.
Qoǵamdyq kólikterdiń qozǵalysy kelisilgen kestege sáikes shekteledi (07:00-den 10:00, 12:00-den 15:00, 17:00-den 20:00-ge deiin). Olarǵa jeke qorǵanysh zattarymen qamtamasyz etilgen jaǵdaida ǵana ruqsat beriledi.
Taksi qyzmeti arnaiy tirkelgen uiymdarmen, tiisti materialdyq tehnikalyq sanitarlyq gigienalyq jaǵdaimen qamtamasyz etilgen avtokólik quraldarynda ǵana kórsetiledi.
Janar-jaǵarmai quiý stansalary, qarjy institýttary, bankter, banktiń aiyrbastaý pýnktteriniń shtattyq rejimde jumys isteýine ruqsat etiledi.
Jambyl oblysynyń aýmaǵynda adamdardyń jáne jeke kóliktiń erkin júrip-turýyna tyiym salynady. Teke kelesi jaǵdailarda ruqsat etiledi: Azyq-túlik taýarlaryn, dárilik preparattardy jáne meditsinalyq buiymdardy satyp alý; meditsinalyq kómekke júginý; úi janýarlaryn tirkeý derekteri boiynsha turǵylyqty mekenjaiy mańynda serýendeý, onyń ózinde ýaqytsha, 30 minýttan aspaý kerek; memlekettik jáne áleýmettik kómek alý maqsatynda memlekettik jáne ózge de mekemelerge barý; kútpegen TJ jáne adamnyń ómiri men densaýlyǵyna qaýip tóndiretin basqa da jaǵdailar bolǵan jaǵdaida; kóktemgi egis jáne basqa da aýyl sharýashylyǵy jumystaryn júrgizý úshin (aýyldyq jerlerde).
Bul rette bir otbasy múshelerinen basqa, kámeletke tolmaǵandarǵa eresekterdiń erip júrýinsiz, sondai-aq jeke qorǵaný quraldaryn paidalanbai, onyń ishinde kólik quraldaryn basqarý kezinde 3 adamnan artyq (qoǵamdyq tasymaldaýdy qospaǵanda) otyrǵyzýǵa jáne júrip-turýyna tyiym salynady.
Ákimdikterge jalǵyzilikti qart adamdardy, múgedekterdi qoldaý qyzmetin uiymdastyrý tapsyryldy.
Azyq-túlik sýpermarketterin, azyq-túlik dúkenderin, dárihanalardy, veterinariialyq dárihanalardy, aýyl sharýashylyǵy tehnikalaryna arnalǵan avtobólshekterdi satý, aýyl sharýashylyǵy janýarlaryna arnalǵan jem-shópterdi ótkizý oryndaryn qospaǵanda, saýda-oiyn-saýyq ortalyqtarynyń, bazarlardyń, azyq-túlik emes taýarlardyń barlyq saýda nysandarynyń, avtosalondardyń, avtoqosalqy bólshekter satý salondarynyń, gúl pavilondarynyń qyzmeti toqtatyldy.
Dóńgelek jóndeý úshin jeke turǵan bokstardy (ekiden artyq emes), «Qazposhta» bólimshelerin, qonaq úilerdi qospaǵanda, barlyq qyzmet túrlerin kórsetý núkteleriniń qyzmeti toqtatylady.
Qoǵamdyq tamaqtandyrý nysandary tek «tutynýshylarǵa jetkizip berý» qaǵidaty boiynsha jumysyn saǵat 10-00-den 22-00-ge deiin jalǵastyrady.
Halyqtyń jappai jinalatyn oryndaryna, onyń ishinde jaiaý serýendeýge arnalǵan oryndarǵa (kóshelerge), saiabaqtarǵa, skverlerge, jaǵalaýǵa, alańdarǵa, balalardyń oiyn alańdaryna, sport alańdaryna jáne qala turǵyndarynyń ózge de demalys oryndaryna kirýge tyiym salynady.
