Jambyl oblysy ákimdigi ishki saiasat basqarmasy "Óńirlik kommýnikatsiialar qyzmetiniń" alańynda oblys ákimdigi ishki saiasat basqarmasynyń basshysy Berik Ýáli, mádeniet, arhivter jáne qujattama basqarmasynyń basshysy Dúisenáli Byqybaev, Taraz qalasy ákiminiń orynbasary Kenjebek Oljabaidyń qatysýymen baspasóz konferentsiiasy ótti.
Spikerler «Qosh keldiń, áz-Naýryz!» merekesin uiymdastyrýdyń is-sharalar jospary týraly baiandap, jýrnalisterdiń suraqtaryna jaýap berdi.
Jambyl oblysynda biyl ekinshi jyl qatarynan Ulystyń Uly kúni Naýryz merekesi 14 naýryzdan 22 naýryzǵa deiin atap ótilmek.
14 naýryz – «Amal» kúni amandyq-saýlyq surasyp, úlken-kishi qystan aman-esen shyǵyp, Áz Naýryzǵa jetkenine shúkirshilik etip, bir-birine izgi tilekter aitady. Kórisý – tek adamdar amandasyp, jaqsylyq tileitin mereke emes, sonymen qatar úlkenderge izet kórsetip, iltipat bildiretin taǵylymdy dástúr bolyp sanalady.
Sondai-aq, qalalyq mádeniet úiiniń aldynda «Amal kúnine» orailastyrylǵan qoiylymdar uiymdastyrylyp, baýyrsaqtar taratylady. Odan keiin jergilikti ónerpazdardyń qatysýymen 1,5 saǵattyq merekelik kontsert usynylady.
15 naýryz – «Taǵyzym» kúni qasietti juma kúnine orailastyrylyp qoiylǵandyqtan «Óli razy bolmai, tiri baiymaidy» degen qaǵida boiynsha ata-baba rýhyna Quran baǵyshtalady.
16 naýryz – «Alas» kúni tazalyqqa mán berilip, «Bulaq kórseń - kózin ash!» degen atpen jalpyhalyqtyq senbilik ótkiziledi. Naýryz merekesine deiingi tazalyq jumystaryna oblys jáne qala, aýdan basshylary, ardagerler, qoǵam qairatkerleri t.b. qatysyp, alleialarǵa, saiabaqtarǵa aǵashtar otyrǵyzý, ekologiialyq aktsiialar uiymdastyrylady.
17 naýryz – «Meiirim» kúni kóp balaly analarǵa, áleýmettik ahýaly tómen otbasylarǵa, kómekke muqtaj múgedek jandarǵa qairymdylyq jasalady.
18 naýryz – «Yntymaq» kúni aimaqtaǵy etnomádeni ortalyqtar men etnos ókilderiniń qatysýymen merekelik kontsertter, salt-dástúrlerdi nasihattaý kórsetilimderi uiymdastyrylady. Óitkeni Naýryz birlikke, yntymaqqa shaqyratyn qaiyrymdylyq aiy bolǵandyqtan qoǵamdy meiirimdi bolýǵa úgitteidi.
19 naýryz – «Jańarý kúni» jaryq dúnie esigin ashqan nárestelerge ákimderdiń atynan daiyndalǵan arnaiy quttyqtaý ázirlenip, sábilerge qajetti syilyqtar beriledi.
20 naýryz – «Bereke kúni» qalanyń birneshe eldi mekenderinde, aýdandarda jergilikti kásipkerlerdiń aýylsharýashylyq ónimderinen tómen baǵamen jármeńke uiymdastyrý, taqyrypqa sai halyq ánderinen radiokontsertter uiymdastyrý josparlanyp otyr.
21 naýryz – Ulystyń Uly kúni qarsańynda kúrdeli jóndeýden ótken «Jastar» alleiasy paidalanýǵa beriledi. Atalǵan saiabaqta «Mahabbat» alleiasy, «Bilim» alańy, «Jastar» internet-kafesi, «Kitap» jáne "Sahna" alańshasy ashylady. Osy «Jastar» aleiasynda «Uly dalanyń jeti qyry» maqalasynyń «Túrki áleminiń besigi» bólimin aishyqtaityn teatrlandyrylǵan kórinispen ashylyp, 700-ge jýyq ónerpazdardyń qatysýymen «Kóktem» horeografiialyq kompozitsiiasy jáne dombyrashylar, qobyzshy, daýylpazshylardyń qatysýymen kúi oryndaý sheberlikterin kórsetetin kompozitsiialar usynylady. Bul jerde ulttyq sport oiyndary, altybaqan, qolóner kórmeleri uiymdastyrylady. Sondai-aq, Qazaqstan estrada juldyzdary Baǵdat Samedinova, Ádil men Dana, Alisher Karimov, Ábdiǵappar Álqoja, Serikbol Sailaýbek jáne Kenen Ázirbaev atyndaǵy Jambyl oblystyq filarmoniiasynyń ánshileriniń kontserttik baǵdarlamasy usynylyp, kesh sońy merekelik otshashýǵa ulasady.
22 naýryz – «Jańa kún», iaǵni oblys jáne aýdan turǵyndary jalpy halyqtyq serýenge shyǵady. Turǵyndary óz jaqyndaryn, týystaryn, kórshileri men alys-jaqyn aǵaiyndaryn merekemen, «Jańa jyldyń» alǵashqy «Jańa» kúnimen quttyqtaidy. Kópshilik bir-birine syi-siiapat syilap, arazdasqan aǵaiyn-týys tatýlasady. Merekelik dastarhan jaiylyp, bir-biriniń úiine qonaq bolady.
