2020 jyly memlekettik biýdjetke 9 trln 751 mlrd teńge kiris tústi. Bul týraly onlain rejimde halyq aldynda esep berýi kezinde Qarjy ministri Erulan Jamaýbaev málim etti, dep habarlaidy QazAqparat.
«Ótken jyly memlekettik biýdjetke 9 trln 751 mlrd teńge kiris tústi nemese jospar 102,7 paiyzǵa atqaryldy. 2019 jylmen salystyrǵanda 62,7 mlrd teńgege ósti, iaǵni jospar 100,6 paiyzdy qurady. Jergilikti biýdjetterdiń kiristeri boiynsha jospar 108 paiyzǵa atqaryldy nemese josparlanǵan 2 trln 955 mlrd teńgeniń ornyna 3 trln 191 mlrd teńge tústi», - dedi Jamaýbaev.
Onyń aitýynsha, byltyr respýblikalyq biýdjetke 6 trln 561 mlrd teńge kiris tústi nemese jospar 100,3 paiyzǵa atqaryldy. Kirister boiynsha jospar 22 mlrd teńgege, onyń ishinde salyqtar – 16 mlrd teńgege asyra oryndaldy.
«Salyqtar boiynsha asyra oryndaýdyń negizgi somasy korporativtik tabys salyǵyna, paidaly qazbalardy óndirý salyǵyna jáne shiki munaiǵa salynatyn eksporttyq keden bajyna tiesili boldy», - dedi ministr.
Sonymen qatar ol byltyrǵy biýdjet shyǵystaryna qatysty toqtaldy.
«Memlekettik biýdjettiń shyǵystary 98,2 paiyzǵa, respýblikalyq biýdjettiń shyǵystary 98,3 paiyzǵa, jergilikti biýdjetterdiń shyǵystary 99,1 paiyzǵa atqaryldy. Respýblikalyq biýdjet boiynsha 14 trln 234 mlrd teńge somaǵa shyǵystar júrgizildi. Atqarylmaý 241 mlrd teńgeni qurady. Onyń ishinde 224 mlrd teńge Úkimet rezervi boiynsha únemdelgen aqsha jáne ózge de únemdeý. Igerilmegeni - 15,8 mlrd teńge. Onyń negizgi sebepteri: ónim berýshilerdiń shart talaptaryn buzýy, tólem jónindegi qujattardy uzaq kelisý, oryndalǵan jumystar aktilerin usynbaý jáne basqa da jaǵdailarǵa bailanysty», - dedi ministr.
