Osy ýaqytqa deiin jarylǵysh zattar týraly habarlamanyń birde-biri rastalǵan emes. Bul týraly QR IIM ekstremizmge qarsy is-qimyl departamenti bastyǵynyń orynbasary Darhan Razýev aitty, dep habarlaidy QazAqparat.
«Terrorizm aktisi týraly kórineý jalǵan habarlama – bul qoǵamdyq tártipke keri áser etetin qaýipti qylmystardyń biri. Osy qylmystyń qoǵamǵa qaýiptiligi sonshalyq, mundai habarlama túsken jaǵdaida adamdardyń arasynda úrei men qorqynysh paida bolady. Al memlekettik organdardyń, kásiporyndar men mekemelerdiń jumysyna edáýir kedergi keltiredi. Osyndai jaǵdaida quqyq qorǵaý organdary eń aldymen shynaiy qaýiptiń bolý múmkindigin eskere otyryp, tiisti áreket jasaidy. Adamdardy qaýipti bolýy múmkin aimaqtardan evakýatsiialaýǵa májbúr bolady», - dedi ol IIM baspasóz qyzmeti alańynda brifing barysynda.
Sondyqtan, onyń atap ótýinshe, kelip túsken osyndai barlyq aqparattar boiynsha jedel qyzmetter mindetti túrde oqiǵa ornyna barady. Adamdar syrtqa shyǵarylady. Ǵimarat muqiiat, jan-jaqty tekseriledi. Jarylǵysh zatty izdeý jáne onyń saldaryn boldyrmaý úshin kezek kúttirmeitin is-sharalar qabyldanady.
«Sonymen birge atap ótetin jait, osyǵan deiin bolǵan barlyq jaǵdaida jarylǵysh zattar týraly aqparat rastalǵan emes. Al, bul óz kezeginde politsiia, ulttyq qaýipsizdik organdarynyń, órtke qarsy qyzmet jáne meditsinalyq jedel járdem qyzmetiniń kúsh-quraldaryn bosqa jumsaýǵa ákep soǵady. Sol ýaqytta politsiianyń kómegi shyn máninde qaýipti qylmystyń aldyn alýǵa qajeti bolýy múmkin», - dedi Darhan Razýev.
Departament bastyǵynyń orynbasary bul qylmystar qoǵamǵa da, memleketke te edáýir ziian keltiretindigin ári sol mekemeniń nemese kásiporynnyń jumys kestesin buzatyndyǵyn, al azamattarda qorqynysh sezimi paida bolatyndyǵyn aitady.
«Bizdiń esepteýimiz boiynsha osyndai jalǵan shaqyrtýǵa bir ret shyqqannyń ózinde 200 myń teńgeden 300 myń teńgege deiin qarajat jumsalady. Al iri kásiporyndardyń jumysy toqtap qalǵanda árbir saǵat saiyn milliondaǵan teńge ziian keledi»,- dedi ol.
