Foto parlam.kz
Májilis depýtaty Bolat Kerimbek Ádilet ministrligi men Bas Prokýratýra elimizdegi qazirgi túrli «biler» atyn jamylǵan uiymdardyń jumysyna tekserý júrgizip, olardyń qyzmetiniń zańǵa sáikestigin pysyqtaýy kerek dep esepteidi. Bul týraly ult.kz habarlaidy."Kemeńger Abai kezinde aýzymen oraq orǵan pysyqailarǵa qarata «Bas-basyna bi bolǵan óńkei qiqym, Minekei, buzǵan joq pa eldiń siqyn» dep, olardy qatań synaǵan edi. Ókinishke qarai, sońǵy kezde elimizde osyndai ózin-ózi sailap alǵan jalǵan «biler» jańbyrdan keiingi sańyraýqulaqtai qaýlap ósip, kóbeiip ketti. «Qazaq bileri», «Qazaq biler alqasy» sekildi ataýlarmen qurylǵan túrli rýlyq-júzdik qoǵamdyq uiymdar qaptady. Tipti, resmi tirkelmei-aq óz aldyna ońasha otaý quryp, bi bolyp júrgender de jeterlik. Budan bólek, at tóbelindei az ǵana toptyń qoldap-qolpashtaýymen Bas bi atanyp, asataiaq ustap, aqyl aityp, sheshim shyǵaryp júrgender de bar", -deidi depýtat.
Depýtattyń oiynsha olardyń keibiriniń nieti durys bolǵanymen, maqsaty – atyn shyǵaryp, ataq alý, jurt ústinen kún kórip, mal tabý sekildi.
"Osyndai jurt bilmeitin, elge aitarlyqtai eńbegi sińbegen, kópshilik moiyndamaǵan qaptaǵan biler ár iske jónsiz aralasyp, kósemsip, jurtty jik-jikke bólýimen qoimai, ózara talasyp, qazaqtyń ǵasyrlar qoinaýyndaǵy qasietti biler institýtyna kir keltire bastady", -degen depýtattyń aitýynsha bi degende qazaqtyń oiyna eń aldymen aqyly asqan áigili Tóle bi, qara qyldy qaq jarǵan qaz daýysty Qazybek bi, sheshen de kósem Áiteke bi, toptan ozǵan Tolybai bi sekildi tańdaýly tulǵalar keletin.
Bolat Kerimbek atam zamannan qalǵan biler institýty bul búgingi sot biligi. Al qazirgi qaptaǵan biler osy qasterli ataq, abyroily tárbieniń qadirin ketirip, qunyn túsirýde dep esepteidi. "Sondyqtan osy biler uiymdarynyń jumysyn jiti tekseretin ýaqyt keldi" dep otyr.
"Biz naqty qurylymdalǵan sot júiesi bar, árbir azamaty alqabiler men halyqaralyq standarttarǵa sáikes quqyqtyq qorǵaý quqyǵyna ie elde ómir súrip jatyrmyz. Al biler kelip, sol qalyptasqan normany buzbaqshy ma?! Olai bolmasa, olardyń kózdegeni ne, maqsaty ne? Nege ózderin ózderi bi sailap alǵan? Kim olarǵa mundai ókilettik bergen?! Árbir óńirde jergilikti ákimdik pen Máslihattar, sot biligi men quqyq-qorǵaý organdary bar, aqsaqaldar men qoǵamdyq keńester zań aiasynda qyzmet etýde. Týyndaǵan máseleleni sheshetin de, kóteretin de osy zańdy uiymdar men mekemeler. Iaǵni zań men tártip kontseptsiiasyn iske asyratyn bilik tarmaqtary bizde naqty aiqyndalǵan. Biz tarihi jadymyzdyń mańyzdy ekenin túsinemiz, biraq bolashaǵymyz jarqyn bolý úshin keshe men búgindi shatastyryp almaýymyz kerek. Osy rette, Prezidentimiz aitqandai: «Biz zań men tártip, bilim men parasat ústemdik etetin qoǵam qurýymyz kerek. ...Sondyqtan biz órkenietti el bolýǵa kedergi jasaityn jaǵymsyz ádetterden arylýymyz kerek» – degen sózderin basshylyqqa alýymyz qajet. Sondyqtan, ózderin bi sailap, máselelerge pátýa shyǵaryp júrgen túrli adamdardyń áreketine naqty quqyqtyq baǵa berilýi tiis. Biz tek zań ústemdik etip, tártip bileitin qoǵamda ómir súrýimiz qajet", -deidi depýtat Kerimbek.
