© Photo : http://kazminerals.info
Qazaqstandyq shahterlerdiń bári birdei zeinetke erte shyqqysy kelmeidi. Bul týraly Úkimet basshysynyń orynbasary Eraly Toǵjanov málimdedi, dep habarlaidy Sputnik Qazaqstan.
Vitse-premerdiń aitýynsha, kenshilerdiń bári Úkimetten zeinet jasyn tómendetýdi surap otyrǵan joq. Arasynda 63 jasty ózgerissiz qaldyrýdy usynyp jatqandar bar. Oǵan shahterlerdiń joǵary jalaqysy sebep.
"Eń aýyr jumys shahterlerdiki degenmen kelisemin. Ózim talai ret shahtaǵa tústim, kenshilermen kezdestim. Shynymen de aýyr jumys. Biraq shahterlerdiń bári birdei zeinetke erte shyqqysy kelmeidi. Sebebi jerasty jumystary úshin joǵary jalaqy alady. Mundai aqshadan eshkim aiyrylǵysy kelmeidi. Bizge túrli usynystar túsedi: bireý zeinet jasyn tómendetkisi keledi, endi bireýleri sol kúii qaldyrýdy usynady", - dedi Toǵjanov Úkimet kýlýarynda.
Aitýynsha, densaýlyǵy syr bergen kenshiler jerústi jumystaryna aýysady eken.
Ol qazir búkil álemde zeinet jasy kóterilip jatqanyn atap ótti. Sondyqtan Qazaqstanda bul másele jan-jaqty talqylanady.
"Jumys toby quryldy. Osy bastamany kótergen toptarmen kezdesýler ótkizilip jatyr. Áleýmettik kodeksti ázirleý aiasynda jumys tobymen tiisti jumys júrgiziledi", - dedi vitse-premer.
Osy oraida jýrnalister zeinet jasyna qatysty naqty sheshim qashan qabyldanatynyn surady.
"Biyl Áleýmettik kodeksti qabyldaimyz. Jyl sońyna deiin bir sheshimge kelemiz", - dep sendirdi Toǵjanov.
