Foto: gov.kz
Qazaqstandyqtar 20 jyldan asa eńbek ótili bar azamattardyń zeinetaqysy birden 30 paiyzǵa kóteretini týraly aqparat ala bastady. Reseilik portaldarda qazaqstandyqtardyń zeinetaqysy kóteriletini týraly jalǵan aqparat tarady. Bul aqparatqa qatysty Eńbek jáne halyqty áleýmettik qorǵaý ministrligi ókilderi túsinikteme berdi, - dep habarlaidy Tengrinews.kz saity.
Earth Daily News portaly eńbek kitapshalarynyń ielerine zeinetaqyny qaita eseptep, ony 50 paiyzǵa kóterýge ýáde bergen. Sonymen qatar, Moika78 basylymy ai saiynǵy tólemderdi 30 paiyzǵa kóterýge laiyq azamattardyń taǵy bir sanaty bar ekenin habarlady.
Silteme qazaqstandyq saittarda jarnama retinde paida bolǵan, biraq Jeli qoldanýshylary materialda qazaqstandyqtardy "qazaqtar" dep sipattaǵan. Al bul otandyq BAQ-qa tán emes.
Internet-alaiaqtar Resei azamattaryna tólenetin zeinetaqy tólemderiniń ósimi týraly aqparatty ózgertkeni belgili boldy. "Moskovskii komsomolets" basylymynyń málimetinshe, 2022 jylǵy 1 qarashadan bastap 80 jasqa tolǵan jáne Qiyr Soltústikte belgili bir eńbek ótiline jetken reseilikterge, sondai-aq, eńbek qyzmetin toqtatqandarǵa zeinetaqyǵa qosymsha aqy mólsheri qaita eseptelgen.
Eńbek jáne halyqty áleýmettik qorǵaý ministrliginiń baspasóz hatshysy Sáken Dildahmettiń aitýynsha, kóptegen sait mundai aqparatty qaralym jinaý úshin ádeii taratady.
"Kóptegen saitta mundai bannerler ornalastyrylǵan, onda negizinen belgili tulǵalar týraly "Sary baspasózge" arnalǵan aqparat nemese jalaqyǵa, shyndyqqa janaspaityn joǵary tabys alýǵa qatysty keibir jalǵan aqparat jariialanady. Qoldanýshylar jalǵan aqparatqa aýysyp, faktcheking júrgizbeidi. Ókinishke qarai, adamdar aqparatty teksermeidi", - dep túsindirdi ol.
Baspasóz hatshysy qazaqstandyqtardy internetten aqparatty tekserip, memlekettik organdardyń saittaryndaǵy, áleýmettik jelilerdegi resmi paraqshalardaǵy jáne jańalyqtar basylymdaryndaǵy resmi aqparatqa senýdi surady.
"Jalǵan aqparatty, árine, tekserý kerek. Biraq 20 jyl jáne odan da kóp eńbek ótili bar qazaqstandyqtardyń zeinetaqyny birden 30 paiyzǵa ósiretini - bul, árine, senimsiz aqparat. Mundai kúdikti habarlamalardy tekserý úshin adamdar resmi resýrstarǵa habarlasýy kerek", - dep túsindirdi ol.
Ministrliktiń baspasóz qyzmeti ókilderi 2018 jylǵy 1 shildeden bastap memlekettik bazalyq zeinetaqy tólemi árbir alýshyǵa onyń zeinetaqy júiesine qatysý ótili eskerile otyryp, jeke taǵaiyndalatynyn eske saldy. Bul rette zeinetaqy júiesine qatysý kezeńine 1998 jylǵy 1 qańtardaǵy jaǵdai boiynsha yntymaqtastyǵy júiesinde jumys istegen eńbek ótili, sondai-aq, mindetti zeinetaqy jarnalary tólengen kezeńder kiredi.
"Eger zeinetaqy júiesine qatysý ótili 10 jyl jáne odan az bolsa, sondai-aq, ol bolmaǵan jaǵdaida bazalyq zeinetaqy mólsheri eń tómengi kúnkóris deńgeiiniń 60 paiyzyna teń bolsa (2023 jyly 34 myń teńge - esk.), onda jyl saiyn 10 jyldan asaonyń mólsheri 2 paiyzǵa ósedi. Mysaly, qatysý ótili 20 jyl bolǵanda bazalyq zeinetaqy eń tómengi kúnkóris deńgeiiniń 80 paiyz bolady. 30 jáne odan da kóp jyl ótili kezinde ol eń joǵary mólsherde - eń tómengi kúnkóris deńgeiiniń 100 paiyzynda belgilenedi", - delingen habarlamada.
Ministrliktiń baspasóz qyzmeti ókilderiniń málimetinshe, mindetti zeinetaqy jarnalary neǵurlym júieli jáne tolyq kólemde tólense, zeinetkerlik jasqa jetkendegi bazalyq zeinetaqy tóleminiń mólsheri soǵurlym kóp bolady. Óz kezeginde, jasyna qarai zeinetaqy tólemderiniń mólsheri 1998 jylǵy 1 qańtardaǵy jaǵdai boiynsha eńbek ótiline (keminde 6 ai qajet - esk.) jáne zeinetkerlikke shyqqanǵa deiingi kezeńde alynǵan ortasha ailyq tabysqa bailanysty.
