Jetisý oblysynda 19 jastaǵy boijetken men onyń 41 jastaǵy anasy 25 million teńge kóleminde aqsha bopsalady degen kúdikke ilindi. Qazir atalǵan derek boiynsha sotqa deiingi tergeý júrgizilip jatyr, dep habarlaidy ult.kz.
Áleýmettik jelilerde Kóksý aýdandyq politsiia bóliminiń aldynda kúdiktilerdiń týystary jinalǵan sát túsirilgen video tarady. Kadrdan qolynda emizýli sábii bar egde jastaǵy áieldi kórýge bolady. Týystarynyń aitýynsha, ustalǵan boijetkenniń segiz ailyq sábii anasynyń qaraýynsyz qalǵan.
Olardyń málimetinshe, jas ana balasynyń ákesimen kezdesýge barǵan. Týystary er adamnyń oǵan 25 million teńge kóleminde materialdyq kómek kórsetýge ýáde bergenin alǵa tartady. Alaida kezdesý kezinde boijetkendi politsiia qyzmetkerleri ustaǵan.
Al Jetisý oblystyq politsiia departamenti bul oqiǵaǵa qatysty óz málimdemesin jariialady.
Vedomstvonyń habarlaýynsha, asa iri kólemde bopsalaý faktisi boiynsha sotqa deiingi tergeý bastalǵan. Bul qylmys zań boiynsha asa aýyr sanatqa jatady.
Politsiianyń málimetine sáikes, jedel-izdestirý is-sharalary barysynda qylmystyq jaýapkershilikke tartpaý úshin talap etilgen 25 million teńgeni alý kezinde eki kúdikti áiel qylmys ústinde ustalǵan.
Qazirgi ýaqytta anasy men qyzy ýaqytsha ustaý izoliatoryna qamaldy. Olarǵa qatysty bultartpaý sharasyn tańdaý máselesin sot qaraidy.
