Jetisý oblysynda milliondaǵan qazaqstandyqtyń jeke málimetterin zańsyz paidalanǵan degen kúdikpen kollektorlyq agenttiktiń qyzmeti áshkerelendi, dep habarlaidy ult.kz.
Oblystyq politsiia departamentiniń málimetinshe, kúdiktilerdiń qolynda azamattardyń derekteri jinaqtalǵan arnaiy aqparattyq júie bolǵan. Bazada adamdardy tegi, aty-jóni, JSN jáne uialy telefon nómiri arqyly izdeýge múmkindik jasalǵan.
Tergeý derekterine sáikes, júiede Qazaqstannyń shamamen 16 million azamatyna qatysty aqparat saqtalǵan bolýy múmkin.
Zańsyz áreket prokýratýra jáne UQK qyzmetkerlerimen birlesken jedel sharalar barysynda anyqtalǵan. Tergeý aiasynda derekter bazasyn uiymdastyrýǵa jáne paidalanýǵa qatysy bar degen kúdikpen úsh adam ustaldy.
Kúdiktilerdiń turǵylyqty mekenjailary men jumys oryndarynda tintý júrgizilip, kompiýterler, serverlik qurylǵylar jáne mobildi tehnikalar tárkilendi. Sonymen qatar birqatar azamat tekserý sharalary úshin politsiiaǵa jetkizilgen.
Atalǵan derek boiynsha sotaldy tergeý bastaldy. Quqyq qorǵaý organdary aqparattyń qaidan alynǵanyn, qandai maqsatta paidalanylǵanyn jáne úshinshi tulǵalarǵa taratylǵan-taratylmaǵanyn anyqtap jatyr.
Politsiia jeke derekterdi zańsyz jinaý, saqtaý jáne taratý zań boiynsha jaýapkershilikke ákeletinin eskertti.
Eske salaiyq, ótken jyly internette 16 million qazaqstandyqtyń jeke derekteri taraǵany týraly aqparat shyqqan bolatyn. Sol kezde ýákiletti organ málimetterdiń júieni buzý arqyly emes, zańdy qoljetimdiligi bar akkaýnttar arqyly syrtqa shyǵarylýy múmkin ekenin málimdegen edi.
