Reseide koronavirýs juqqan naýqastardy emdegen dárigerlerdiń shamamen úshten bir bóligi COVID-19 indetine bailanysty statistikany burmalaý týraly “nusqaýlyq” alǵan. Jańa zertteý qorytyndysy osyny kórsetken.
Saýalnama qorytyndysyna sáikes, zertteýge qatysqan dárigerlerdiń 35,8 paiyzy "shifrlaý júiesiniń" kómegimen koronavirýs juqqan naýqastar sany men adam ólimi kórsetkishin túzetý týraly "nusqaýlyq" alǵanyn rastaǵan. Shifrlaý júiesi ádette naýqas óliminiń sebebin anyqtaý úshin qoldanylady.
1-15 mamyr aralyǵynda júrgizilgen saýalnamaǵa 509 respondent qatysqan. Zertteý Resei koronavirýstan qaitys bolǵandar sanyn tómendetip kórsetedi (atap aitqanda virýstan qaitys bolǵandardy ózge aýrýdan, onyń ishinde pnevmoniiadan qaitys boldy dep kórsetýi múmkin) degen boljam paida bolǵan kezde ótkizilip otyr.
Saýalnama oryssha sóileitin dárigerler arasynda tanymal "Dáriger nusqaýlyǵy" (Rýkovodstvo vracha) smartfon qosymshasy arqyly júrgizilgen. Qosymsha iesi, "Meditsinskie informatsionnye resheniia" kompaniiasynyń bas direktory Konstantin Komanovtyń aitýynsha, tirkelgen qoldanýshylar qosymshadaǵy aqparatty qoldaný úshin jáne zertteýge qatysý úshin meditsina qyzmetkeri ekenin dáleldeýi tiis.
Sońǵy aqparat boiynsha, Reseide 326 myńnan astam adamǵa virýs juqqan, 3249 adam qaitys bolǵan. Reseide adam ólimi kórsetkishi ǵalamdyq indetten qatty zardap shekken eldermen salystyrǵanda tómen.
