Resei ózi basyp alǵan jerdegi Ýkraina astyǵyn anneksiialanǵan Qyrymǵa tasyp, ári qarai Túrkiia, Egipet, Siriiaǵa aparyp jatyr. "Shemalar" baǵdarlamasynyń (Azat Eýropa/Azattyq radiosynyń jobasy) jáne Bi-bi-si men Reuters zertteýshileri osyndai qorytyndyǵa kelgen" dep habarlaidy Nastoiashee Vremia telearnasy.
Qazirgi ýaqytta Ýkraina "Resei kem degende 400 myń tonna astyǵymyzdy urlady" dep otyr.
"Shema" jýrnalisteri Ýkrainanyń urlanǵan astyǵy tielgen júk kemesi "Qyrymdaǵy Sevastopol portyna jetkende radardy ajyratyp tastaitynyn, sol sebepti ony keme monitoringimen baqylaý múmkin bolmai qalatynyn aitady. Alaida júk artyp bara jatqan kemelerdi spýtinikten jasyrý múmkin emes" deidi zertteýde.
Jýrnalister byltyrǵydan góri biyl Qyrymnan áldeqaida kóp astyq shyǵarylyp jatqanyn anyqtaǵan. Olar "Qyrymda astyqtyń sonshalyq kóp bolýy jáne onyń báriniń Resei men Qyrymdy jalǵaityn jalǵyz kópir arqyly tasymaldanýy múmkin emes. Resei Ýkraina jerindegi astyqty júk kólikterimen de tasýǵa kóshken" dep sanaidy.
Qyrym túbeginen astyqty kememen alyp shyǵyp jatyr. Tek Sevastopol qalasynan emes, Feodosiia men Kerch porttarynan da shyǵýda. Bul shemany Qyrymnyń Ýkraina taǵaiyndaǵan, Kievte turatyn prokýrory Igor Ponochovnyi da rastap otyr.
Ponochovnyidyń sózinshe, urlyqpen ainalysyp júrgen kemeler jalǵan kujat jasap alǵan. Jalǵan qujatta kemeler Qyrymnan emes, Dondaǵy Rostovtan, Novorossiisk pen Reseidiń ózge de porttarynan shyqqan dep kórsetilgen.
Birikken ulttar uiymy men álemniń kóptegen elderi Resei basyp kirgen soń Ýkraina jerinen teńiz arqyly astyq pen ózge de azyq-túlik áketý múmkin bolmai qalǵanyna alańdaýshylyq bildirgen. Munyń sońy álemniń kedei elderinde ashtyqqa ulasýy múmkin degen qaýip bar. Resei ózine artylǵan kináni teristeýmen shuǵyldanyp keledi.
