Qatardyń Ras-Laffan ónerkásiptik keshenindegi gaz óńdeý nysanynda qýatty jarylys bolyp, 13 adam qaza tapty. Taǵy 66 adam jaraqat alǵan. Bul týraly Qatar biligi málimdedi, dep habarlaidy ult.kz.
Oqiǵa 21 maýsym keshinde Barzan gazben jabdyqtaý nysanynda bolǵan. Jarylys jumysshylar nysandaǵy operatsiialardy qaita iske qosýǵa daiyndalyp jatqan kezde tirkelgen. Artynsha órt shyqqan. Qutqarý qyzmetteri oqiǵa ornyna dereý jetip, jalyndy baqylaýǵa alǵan.
Qatardyń Energetika ministri Saad ál-Kaabi oqiǵany tehnikalyq aqaýdan bolǵan óndiristik apat dep atady. Onyń sózinshe, jarylys diversiia nemese qasaqana shabýyl saldarynan bolmaǵan. Qazir apattyń naqty sebebin anyqtaý úshin tolyq tergeý bastalǵan.
Qaza tapqandardyń arasynda Úndistan men Pákistan azamattary bolǵan. Jaralanǵan 66 adamnyń barlyǵy meditsinalyq kómek alyp jatyr, olardyń eshqaisysynyń jaǵdaiy ómirine qaýip tóndiretin deńgeide emes dep habarlandy.
Resmi málimet boiynsha, jarylys Qatardyń suiytylǵan tabiǵi gazdy eksporttaityn negizgi nysandaryna tikelei áser etpegen. Ras-Laffan porty men basqa da logistikalyq operatsiialar shtattyq rejimde qalǵan.
Ras-Laffan – Qatardyń energetikalyq infraqurylymyndaǵy mańyzdy nysandardyń biri. Sondyqtan apat halyqaralyq energetikalyq naryqtyń da nazaryn aýdardy. Qazir mamandar nysandaǵy zalaldy baǵalap, apattyń barlyq mán-jaiyn anyqtap jatyr.
