Aqtóbe oblysynyń turǵyny asyl tuqymdy buqalar ósirip jatyrmyn dep, memleketten 158 mln teńge sýbsidiiany zańsyz alǵan, dep habarlaidy ult.kz.
Is materialdaryna sáikes, 40 jastaǵy áiel bes aýyl sharýashylyǵy óndiristik kooperativin is júzinde ózi basqarǵan. Alaida qujattarda olardyń basshylary retinde basqa adamdar kórsetilgen.
Ol veterinar mamannan asyl tuqymdy emes buqalardy arnaiy bazaǵa tirkeýdi suraǵan. Veterinar áieldiń sózine senip, maldy bazaǵa engizgen. Osydan keiin sottalǵan áiel jalǵan málimetter negizinde sýbsidiia alýǵa ótinim berip, memleketten 158 mln teńge alǵan.
Zań buzýshylyqty memlekettik aýdit anyqtaǵan. Áiel kinásin moiyndap, sot úkimi shyqqanǵa deiin memleketke 15 mln teńgeni qaitarǵan.
Sot ony kináli dep tanyp, 6 jyl 8 aiǵa bas bostandyǵynan aiyrdy. Alaida úsh kámeletke tolmaǵan balasy, onyń ishinde úsh jastaǵy balasy bar ekeni eskerilip, jazany óteý keiinge qaldyryldy.
Sonymen qatar sottalǵan áielge memleketke keltirilgen zalaldy tolyq óteý mindetteldi.
