Zaǵip jáne kózi nashar kóretinderge arnalǵan kitaphanalar qory ulǵaitylady. Bul týraly Ortalyq kommýnikatsiialar qyzmetinde «Ulttyq rýhani jańǵyrý» ulttyq jobasy maqsatyn túsindirý kezinde QR Mádeniet jáne sport vitse-ministri Nurǵisa Dáýeshov aitty, dep habarlaidy QazAqparat.
Ulttyq jobanyń mádeniet salasy bóliginde kelesi baǵyttardy qamtidy:
- «Rýhani jańǵyrý» qundylyqtaryn ilgeriletý jáne memlekettik tildi damytý;
- «El rýhy» jobasy.
«El rýhy» baǵytynda «Mádeniet obektilerimen jáne kórsetiletin qyzmettermen qamtamasyz etilýiniń ósýi, onyń ishinde shalǵai aýdandarda», «Mádeniet salasyndaǵy otandyq tsifrlyq resýrstarǵa kirý sanyn arttyrý», «Jańadan shyǵarylǵan otandyq animatsiialyq filmderdiń sany», «Qazaqstandyq kinoprokattyń jalpy kólemindegi otandyq filmderdiń úlesi», «Qoldaý kórsetilgen shyǵarmashylyq jobalar sany» maqsatty kórsetkishteri qarastyrylǵan.
Bul rette 2025 jylǵa deiin 259 mádeniet nysany salynyp, 1 241-i nysany jóndeletin bolady.
Atap aitqanda, infraqurylymdy jaqsartý jáne týrister úshin qolaily jaǵdai jasaý maqsatynda 2025 jylǵa deiin respýblikalyq mýzei-qoryqtardyń aýmaǵynda 8 vizit ortalyq salynatyn bolady.
Sonymen qatar, ministrlik ulttyq jobanyń «El rýhy» II-baǵyty aiasynda Zaǵip jáne kózi nashar kóretinderge arnalǵan kitaphanalar qoryn, sonyń ishinde memlekettik tildegi qordy ulǵaitý is-sharasyn júrgizýde.
Bul baǵyttaǵy jumys elimizdegi múmkindigi shekteýli adamdar úshin teń qoljetimdilikti qalyptastyrý jáne olardyń áleýetin iske asyrý maqsatynda 2025 jylǵa deiingi kezeńdi qarastyrady. Osy baǵyttaǵy jumystar elimizdegi zaǵip jáne nashar kóretin azamattarǵa arnalǵan kitaphanalarmen birlese júrgiziledi. Atalǵan kitaphana oqyrmandarynyń negizgi aqparat kózi - bederli-núkteli shriftpen, iaǵni Brail qarpindegi kitaptar.
Bul rette, ministrliktiń 2021-2023 jyldarǵa arnalǵan biýdjettik josparynda jyl saiyn Zaǵip jáne nashar kóretin azamattarǵa arnalǵan respýblikalyq kitaphanaǵa brail printeri men braildiń portativti taktildi displeilerin, materialdyq emes aktivterdi satyp alý úshin jáne kitaphana qoryn tolyqtyrýǵa tiisti qarajat qarastyrylǵan.
Nurǵisa Dáýeshovtiń sózine qaraǵanda, «Qazaqstannyń kieli geografiiasy» jobasyn júzege asyrý aiasynda Qazaqstannyń kieli obektilerin zertteý men zerdeleýdi qamtityn 40 túrli is-sharany uiymdastyrý kózdelgen.
Qazaqstannyń tarihy men mádenietiniń biregei eskertkishterin IýNESKO-nyń Dúniejúzilik muralar tizimine engizý boiynsha sharalar qabyldaý is-sharasy aiasynda qazirgi ýaqytta Ózbekstan, Qyrǵyzstan jáne Tájikstan elderimen birlesip «Uly Jibek joly: Ferǵana-Syrdariia dálizi» transulttyq nominatsiiasyn ilgeriletý boiynsha qujattardy daiyndaý jumystary júrgizilýde. Nominatsiia aiasynda elimiz aýmaǵyndaǵy kóne qalashyqtaryn IýNESKO tizimine engizý josparlanǵan.
Budan bólek, barlyq júrgizilip jatqan mádeni is-sharalar, teatr maýsymdary, kitaphana qorlary, mýzeiler men kórmeler týraly aqparattyq qoljetimdilikti qamtamasyz ete otyryp, e–culture.kz biryńǵai elektrondy platformasy iske qosylady.
