Senbi jáne jeksenbi kúnderi «Habar» telearnasynan birneshe jobanyń jańa maýsymdaǵy tusaýkeserleri kútilýde, dep habarlaidy "Ult aqparat".
Atap aitqanda, 4 qyrkúiek saǵat 10:00-de «XXI ǵasyr kóshbasshysy» baǵdarlamasy; 4 qyrkúiek saǵat 11:00-de «Áke baqyty» baǵdarlamasy; 5 qyrkúiek saǵat 19:30-da «ECO MEKEN» realiti-shoýy jáne kópten kútken jańalyq - «Kelinjan» telehikaiasynyń úshinshi maýsymy 6 qyrkúiek saǵat 21:30-da kórermenge jol tartady.
«XXI ǵasyr kóshbasshysy» intellektýaldy-tanymdyq oiyny efirge qaita oralady. Respýblikalyq mektepterdegi daryndy jastardy biriktirip, qalyń kópshilikke tanystyratyn bilimdiler báigesin «Habar» arnasynan osy senbi kúni tamashalai alasyzdar.
«ECO MEKEN» - Qazaqstandaǵy alǵashqy ekologiialyq realiti-shoý. Jobanyń maqsaty - ekologiialyq dúnietanymdy keńinen nasihattap, keleshegi zor qatysýshyny anyqtaý. Joba jeńimpazy 10 million teńge kóleminde aqshalai syilyqqa ie bolady.
«Áke baqyty» baǵdarlamasy – januiadaǵy áke men bala arasyndaǵy bailanysty aishyqtaityn, asqar taý ákelerdiń rólin asqaqtatatyn joba. Halyqqa tanymal juldyzdardyń ákelik rólindegi obrazyn kórý kórermen úshin qyzyq bolary anyq.
Qalyń kórermenniń súiikti jobasyna arnalǵan «Kelinjan-3» telehikaiasy qazaqy turmysty, ene men kelin arasyndaǵy qarym-qatynasty ádemi ázilmen, oryndy qaljyńmen jetkizedi. Jańa keiipkerlerimen tolyqqan teletýyndy burynnan da qyzyq bolatyny kúmánsiz.
