Nazarbaev Ziiatkerlik mektepterinde World Robot Olympiad 2021 olimpiadasynda Qazaqstandy tanystyrý quqyǵyn alǵan robototehnika boiynsha ulttyq chempionattyń jeńimpazdary ataldy, dep habarlaidy "Ult aqparat" atalmysh bilim ordasyna silteme jasap.
WRO-2021 baiqaýynyń basty taqyryby – PowerBots, iaǵni qazirgi zamannyń eń jahandyq basymdyqtaryna arnalǵan. Jasyl ekonomikanyń bolashaǵyn qalai qurýǵa bolady, jańartylatyn jańa energiia kózderin qaidan alýǵa bolady, ekologiialyq jaýapkershilikti qalai qalyptastyrady – jas robototehnikter shyǵarmashylyq turǵydan jáne jas erekshelikterine bailanysty Regular, Open, Future Engineers sanattarynda naqty mindetterdi qarastyrdy.
WRO-nyń ulttyq kezeńine barlyǵy qyryqqa jýyq komanda jinaldy, olardyń árqaisysy óńirlik irikteý týrlarynda tabysty óner kórsetti. Onlain format qatysýshylardyń yntasyn, kreativtiligin, úzdik daiyndyǵy pen jas robototehnikterdiń jeńiske degen umtylysyn kórsetti.
Negizgi kishi sanatta Almaty qalasyndaǵy «Aq-Niet» jeke bastaýysh mektebiniń MagicKris komandasy jeńimpaz atandy. Komanda quramy – Kristina Kiseliova, Mark Biriýkov, Petr Moroz jáne bapkeri Oleg Kiseliov. Olar energiia tutynýdy azaitatyn aqyldy úidiń eń ońtaily sheshimin usyndy.
Negizgi orta sanatta chempion titýlyn almatylyq «Lessons.kz» oqý ortalyǵynyń A and B komandasy jeńip aldy. Arian Kadyrov pen Bernar Berdaliev (jattyqtyrýshy Áigerim Erkabaeva) jasaǵan robottar olimpiadalyq jyldamdyqta gibridti jáne elektromobilderdi zariadtaýǵa arnalǵan akkýmýliatorlar taratty.
Negizgi joǵary sanatta komandalarǵa jańartylatyn resýrstardan turǵyn úilerdi elektr energiiasymen jabdyqtaý, akkýmýliatorlarda artyq energiia saqtaý mindetteri qoiyldy. Bul sanatta dástúr boiynsha Nazarbaev Ziiatkerlik mektepteri ókilderine teń keler eshkim bolǵan joq. Shyńǵysbek Balǵabai men Altair Jambyl (jattyqtyrýshysy Iasynjan Shakan) bastaǵan Almatydaǵy himiia-biologiia baǵytyndaǵy NIS-tiń Vector komandasy eń úzdik ýaqyt pen eń jaqsy nátije kórsetti. Osy sanattaǵy barlyq qurmet tuǵyryn Ziiatkerlik mektep oqýshylary ielendi.
WeDo negizgi kategoriiasynda balalar shyndyqqa barynsha jaqyn kúrdeli máselelerdi sheshti. Komandalar orman órtterimen kúresetin jáne adamdardy qaýipsiz jerlerge evakýatsiialaityn robottardy jasaqtady, keiin órtengen aǵashtardyń ornyna jańasyn otyrǵyzdy. Bul tapsyrmany Oral qalasyndaǵy «Jaiq school» robototehnika jáne baǵdarlamalaý mektebiniń (jattyqtyrýshy Esenǵali Qaisar) Jaiq 3 komandasynan shyqqan Daniel Talǵatov pen Erasyl Haidar óte jaqsy oryndady.
Kishi shyǵarmashylyq sanatynda Halyqaralyq robototehnika akademiiasynyń LegoMozg komandasynan Daýjan Beketov pen Kirill Ostrovskii (jattyqtyrýshysy Tom Noah) kún paneli men jel týrbinasyn qamtityn aqyldy elektr stantsiiasyn jasady. Jańartylatyn energiia kózderiniń tiimdiligin arttyrýǵa baǵyttalǵan joba óz avtorlaryna jeńis ákeldi.
Elordalyq fizika-matematika baǵytyndaǵy Ziiatkerlik mekteptiń NG-PHOTOBIO komandasy atynan qatysqan Amina Rahymbergenova, Aldiiar Pazilov jáne Dáýlet Muhanov (jattyqtyrýshysy Baqytgúl Qajykenova) amorfty baldyrlar ósimdiginen biootyn alý úshin jasandy intellekt qaǵidattaryn paidalanatyn robot qurdy. Olar joǵary shyǵarmashylyq sanattaǵy jeńimpazdar dep tanyldy.
Óz sanattarynda úzdik bolǵan barlyq komandalar 2021 jyldyń qarasha aiynda onlain formatta ótetin WRO-2021 álemdik kezeńine qatysý quqyǵyn ielendi. Qazylar alqasy quramyna engen álemdik robototehnikanyń tanymal tulǵalary baiqaýǵa qashyqtan qatysady dep josparlanýda.
Óńirlik jarystar men WRO Ulttyq chempionatyn jyl saiyn Qazaqstandaǵy World Robot Olympiad ulttyq úilestirýshisi retinde «Nazarbaev Ziiatkerlik mektepteri» derbes bilim berý uiymy ótkizedi.
- Olimpiadalar ózekti injenerlik-tehnikalyq mindetterdi praktikalyq sheshýdiń shyǵarmashylyq qabileti men daǵdylaryn damytýǵa, ǵylymi-tehnikalyq qyzmetke qyzyǵýshylyqty keńeitýge, aqparattyq tehnologiialar salasyndaǵy kásipterdiń bedelin arttyrýǵa baǵyttalǵan, – dep atap ótti «Nazarbaev Ziiatkerlik mektepteri» DBBU Aqparattyq tehnologiialar jáne qyzmet ortalyǵy direktorynyń orynbasary Azamat Bidanov.
World Robot Olympiad (WRO) – Dúniejúzilik robottar olimpiadasy, bul 10-19 jas aralyǵyndaǵy 6-11 synyp oqýshylaryna arnalǵan baiqaý.
