Qazaqstan reprodýktivti meditsina qaýymdastyǵynyń prezidenti, QR bas reprodýktology Viacheslav Lokshin ortalyq kommýnikatsiialar qyzmetinde bala súigisi keletin juptarǵa keńes berdi, dep habarlaidy QazAqparat tilshisi.
«Bala súiýge áreket etkenine 1 jyl jáne odan da uzaq ýaqyt bolǵan juptardyń bári dárigerge júginýi kerek. Iaǵni, akýsher-ginekolog pen ýrologqa barady. Sol jerde birneshe taldaý synamasyn tapsyryp, qorytyndysyn kútedi. Óitkeni bedeýlik diagnozy 12 aidan keiin qoiylady. Al juptardyń jasy úlken bolsa, jarty jyldan keiin júginý kerek. Osydan keiin bedeýliktiń sebebi anyqtalady», - dedi Viacheslav Lokshin.
Elimizdiń bas reprodýktology «bedeýlik» shaǵymymen júgingenderdiń jartysyna dári-dármek, hirýrgiialyq emdeý arqyly kómektesýge bolatynyn aitady.
«Qalǵanyna «eko» jasalady. Mysaly, áieldiń jatyr tútikshesi joq bolýy múmkin. Nemese erkektiń spermatozoidy azaiǵany sonsha, jatyrǵa bala bitpeýi múmkin. Mundai jaǵdaida olar reprodýktolog mamanǵa baryp, kvota boiynsha ekouryqtandyrý usynylǵan qujatty kórsetedi. Osydan keiin kezekke turady. Qazir jylyna 7000 kvota beriledi. Sondyqtan kezek boiynsha másele bolmaýy kerek», - dedi maman.
