QR Premer-Ministriniń orynbasary Berdibek Saparbaev bastaǵan Úkimettik delegatsiia Semei qalasynyń jurtshylyǵymen kezdesti, dep habarlaidy "Ult aqparat" primeminister.kz saityna silteme jasap.
Semeiliktermen ótken basqosýda QR Prezidenti Qasym-Jomart Toqaevtyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» atty Joldaýynyń negizgi baǵyttary túsindirildi.
Is-sharaǵa oblys ákimi Danial Ahmetov, Eńbek jáne halyqty áleýmettik qorǵaý ministri Birjan Nurymbetov, Bilim jáne ǵylym ministri Ashat Aimaǵambetov, Mádeniet jáne sport ministri Aqtoty Raiymqulova, Densaýlyq saqtaý vitse-ministri Kamaljan Nadyrov, Aqparat jáne qoǵamdyq damý vitse-ministri Daniiar Isin, sondai-aq úkimettik emes jáne jastar uiymdary, biznes qoǵamdastyqtar, shyǵarmashylyq jáne ǵylym ziialylar ókilderi qatysty.
Vitse-premer óz sózinde Memleket basshysynyń saiasaty halyqty eńbek etýge shaqyryp, memlekettik qoldaý mehanizmin qoldanýǵa bastaitynyn atap ótti.
«Biyl 400 myń otbasyǵa nemese 2 millionǵa jýyq qazaqstandyqqa ataýly áleýmettik kómek taǵaiyndaldy. Alaida járdemaqynyń jaǵdaiy bar adamdarǵa da tólenip kelgeni anyqtaldy. Eskerte ketetin jait, ataýly áleýmettik kómek tek muqtaj jandarǵa ǵana kórsetilýi tiis. Al eńbekke jaramdy adamdar jumys isteýi tiis. Eger mamandyǵy joq bolsa, oqytyp, jumys taýyp berýge, grant pen shaǵyn nesie alýǵa, jeke biznesin ashýǵa qoldaý kórsete alamyz. Áleýmettik qoldaý qoǵamdy memleket asyraidy degen bildirmeýi kerek», - dep atap ótti B. Saparbaev.
Sondai-aq, jas býynnyń tárbiesi men otbasylyq qundylyqtardy saqtaý máselelerine basa toqtaldy.
«Ókinishke orai, jastar arasynda, onyń ishinde kámelettik jasqa tolmaǵan balalardyń ortasynda qylmys pen zorlyq-zombylyq jaǵdailary órship barady. Sondyqtan memleket pen qoǵam birlese otyryp osy baǵytta tiimdi jumys isteýi kerek. Ata-analar balalaryna sanaly tárbie berip, adamgershilik, moraldyq qasietterin boilaryna sińire ósýine zor kóńil bólýi tiis», - dedi ol.
Kezdesý barysynda turǵyndarmen qoǵamdyq kelisimdi nyǵaitý, ana men balany qoldaý, densaýlyq saqtaý jáne áleýmettik qorǵaý salalaryndaǵy qyzmet kórsetý sapasyn arttyrý, mádeniet pen sportty damytý siiaqty basqa da máseleler talqylandy.
Vitse-premer Semeidegi Jedel meditsinalyq járdem aýrýhanasynda biregei angiografiialyq qurylǵymen jasaqtalǵan gibridti operatsiia jasaý bóliminiń jumysymen tanysty.
Respýblika boiynsha birinshi bolyp Semeide ashylǵan gibridti operatsiialyq bólimniń ereksheligi sonda, naýqastarǵa bir mezgilde birneshe ashyq ádispen jáne interventsiialyq aralasý arqyly keshendi gibridti ota jasaýǵa múmkindik beredi.
Gibridti ota jasaý qondyrǵysyn ornatý jáne ǵimaratty qaita qalpyna keltirý jumystaryna jergilikti biýdjetten 2,3 mlrd teńge, onyń ishinde jabdyqtaýǵa 1,7 mlrd teńge jumsaldy. Aita keteiik, keshen halyqaralyq JCI talaptaryna sai, «altyn» standart júiesi boiynsha salyndy. Ortalyq ashylǵaly beri 263 operatsiia jasalyndy. Jalpy jyl saiyn 2,9 myń operatsiia jasaý jospary tur.
Elektr tehnikalyq kolledjinde ótken jiyn barysynda Berdibek Saparbaev bilim salasyndaǵy memlekettik baǵdarlamalardy júzege asyrý, qyzmet kórsetý sapasyn arttyrý, muǵalimderdiń áleýmettik mártebesin kóterý siiaqty basqa da máselelerdi kóterdi.
Vitse-premerdiń jumys sapary Óskemen men oblystyń basqa aýdandarynda jalǵasady.
