QR Premer-Ministriniń orynbasary Gúlshara Ábdiqalyqova bastaǵan úkimettik komissiia kópbalaly otbasylarmen kezdesti, dep habarlaidy "Ult aqparat" Atyraý oblystyq óńirlik kommýnikatsiialar qyzmetine silteme jasap.
Búgin Atyraý oblysyna jumys saparymen kelgen úkimettik komissiia jumysyn jalǵastyrdy. Respýblikalyq «Áleýmettik qamqorlyq» baǵdarlamasy aiasynda QR Premer-Ministriniń orynbasary Gúlshara Ábdiqalyqova aimaqtaǵy kópbalaly otbasylarmen kezdesti. Úkimettik komissiia tórtten segiz balaǵa deiin tárbielep otyrǵan kópbalaly otbasylarǵa bardy. Mysaly, kópbalaly ana Zýlfiia Qaiyrova alty bala tárbielep otyr. Otbasy aiyna 45 myń teńgege shaǵyn jeke úidi jalǵa alǵan. «Kúmis alqa» iegeri qazir dekrettik demalysta. Zýlfiianyń joldasy júrgizýshi bolyp jumys isteidi, jalaqysy - 150 myń teńge. Memleketten alatyn járdemaqylardy qosa eseptegende otbasynyń jalpy tabysy baspana alý úshin qarajat jinaýǵa jetpeidi.
Vitse-Premer Gúlshara Ábdiqalyqova kópbalaly anaǵa ataýly áleýmettik kómek pen turǵyn úi kómegin alý erejelerin túsindirý kerektigin aitty. Zýlfiianyń óńirdegi «Isker ana» jobasyna qatysýy otbasylyq jaǵdaidyń jaqsarýyna septigin tigizbek.
«Kýrsqa qatysý arqyly jańa mamandyqty meńgerip qana qoimai, ózińizge unaǵan kez kelgen mamandyq boiynsha qaita oqýǵa bolady. Aldaǵy kúnderi jeke kásip ashýǵa bir rettik qaitarymsyz aqshalai sertifikat berýdi bastaimyz. Mamyr aiynan bastap kóp balaly otbasylarǵa jalǵa beriletin úi, tiimdi sharttarmen ipotekalyq nesie beriledi, osy sharalar eldiń ál-aýqatyn kóterip, problemalardy sheshedi degen senimdemiz», - dedi Gúlshara Ábdiqalyqova.
Úkimettik komissiia barǵan kópbalaly otbasylardyń basym bóligin turǵyn úi máselesi, jubailardyń biriniń jumysy bolmaýy, memlekettik qoldaý týraly nasihattyń azdyǵy tolǵandyrdy. Aýyldan kóship kelgender úshin qalaǵa tirkeýge turý máselesi de ózekti.
Eńbek jáne halyqty áleýmettik qorǵaý ministri Berdibek Saparbaev ár áielmen jeke sóilesip, jeńildikter men áleýmettik tólemder týraly túsindirdi.
«Atyraý oblysyna Memleket basshysynyń tapsyrmasymen jańa áleýmettik reformany túsindirý maqsatynda keldik. «Áleýmettik qamqorlyq» baǵdarlamasynyń arqasynda eshbir otbasy nazardan tys qalmaidy, osy maqsatta respýblikalyq biýdjetten qarajat bólinip otyr. Bizdiń mindetimiz - ár qazaqstandyqtyń memleketten naqty kómek alýyn qamtamasyz etý», - dep atap ótti Berdibek Saparbaev.
Jumys saparynyń sońynda QR Premer-Ministriniń orynbasary Gúlshara Ábdiqalyqova men Berdibek Saparbaev azamattardy qabyldady. Kópbalaly analar tiisti áleýmettik tólemder týraly, áleýmettik osal toptaǵylar memlekettik qoldaý sharalary týraly málimet aldy.
